Ranieri-a'n Leicester-a kir turin Cambiasso a duh

Leicester City mana­ger thar Claudio Ranieri chuan thla hmasa lawka a contract hmang zotu Esteban Cambiasso chu an club-ah kir leh tura a duh thu a sawi.

Kum 34-a upa Argen­tine midfielder hian season hmasa khan Inter Milan aṭangin Leicester hi a pan a, Premier Lea­gue-a Leicester an cham chhunzawm zel theihna tura an player pawimawh ber pawl a ni.

Inter Milan a enkawl laia Cambiasso lo hrual tawhtu Ranieri chuan, "Cambiasso hi kan hnena rawn kir leh turin ka be tawh a, a thiamna te he team tana rawn hmang leh hram turin ka ngen a ni," a ti.

Europe-a club lian ber ber pawl Valencia, Parma, Juventus, Roma, Inter Milan leh Monaco te lo enkawl tawhtu Ranieri hi Premier League-ah a mikhual lo. Kum li chhung Chelsea a lo enkawl tawh.

Kum 11 hnua Premier League club enkawl leh tur Ranieri chuan, "Eng club pawhin hmasawn an tum dawn a, he in elna ropui tak hmachhawn tur hian kan inpeih tawh a ni. Ka tan chuan match tin hi a pawimawh vek dawn a, minute tawp thlenga rim taka beih duh ṭhin mi ka ni," tiin a ṭawng pawr hle.

Leicester City hian thla hmasa lawk khan season tawp lama ropui taka chet puitu an coach Nigel Pearson chu an bana, Premier League-a kaipuitu ni bawk an coach an ban avang hian Leicester hian sawi­sel an hlawh hle. A bik takin Leicester fan leh football pundit ni bawk Gary Lineker leh Premier League-a club hrang hrang lo enkawl tawh Harry Redknapp te chuan na takin an sawisel a, Ranieri thlengin an bei hial.

Mahse Chelsea a en­kawl lai pawha a ṭawng­kam maksak tak tak vanga lar tak Ranieri a zam lo; kum 63-a upa Italian manager chuan, "Tupawh hi ka zah em em vek a, mahse Lineker leh Redknapp te hi ka buaina an ni lo. Ka rilru leh ngaihtuahna ka sen na ber zawk chu Leicester a ni. He hmunah hian thil ropui tak tih ka duh a, mahse vaivut nen mai chuan eng thil ropui tak mah din theih a ni lo," tiin midang thlawpna a mamawh thu a sawi.

May, 2014 khan Lei­cester neitute chuan kum thum chhungin Premier League-a team ṭha zual panga zingah tel an duh thu an lo sawi tawh a, hemi atan hian pound maktaduai 180 sen an in huam.