Arsenal hi an champion thei ang - Gazidis

Arsenal chief executive Ivan Gazidis chuan season thar lo awm tur chu a nghahhlelh thu leh Premier League-ah an champion theih a rin thu a sawi.

Season thar inbuatsaih nan Gunners hi Singapore-ah Barclays Asia Trophy khelin an zin chhuak a, final-ah Everton 3-1 a hnehin an champion nghe nghe. Tunah chuan Asia aṭangin Europe-ah an kir leh tawh thung.

Tun kar tawp hian Arsenal hian an khelmualah Emirates Cup an khel leh dawn a; France club ṭha Lyon leh German club Wolfsburg an hmachhawn ang. August 2 khian season hmasa Premier League champion Chelsea nen Wembley Stadium-ah FA Community Shield an khel bawk ang.

Chelsea leh Manchester City te elphak ngei tumin Arsenal hian goalkeeper Petr Cech an la lut tawh a, tlarhmaah Real Madrid striker Karim Benzema lakluh an tum mek bakah Gabon international Pierre-Emerick Aubameyang chu an ngaihven mek bawk.

An chet sual fona ṭhin-ah Premier League a tawnhriat nei ṭha leh a rintlak a ni tih hriat sa Cech an lakluh avang leh midfield lailum luah turin England midfielder Jack Wilshere a dam ṭhat bawk avangin beiseina an nei sang hle bawk.

Season hmasa ṭan dawna Barcelona aṭanga an lakluh Alexis Sanchez leh Real Madrid aṭanga an lak luh Mesut Ozil te hi an khelh fuh ni chuan dan ngaihna awm lo khawpa thiam an ni.

Tun hma deuha Arsenal fan-te rilru hah lai ber chu transfer lai a ni ṭhin; an player ṭha ten an chhuahsan ṭhin vang a ni. Thierry Henry, Cesc Fabregas, Robin Van Persie, Samir Nasri, Gael Clichy ten champion duhin an lo chhuahsan tawh. Mahse tunah chuan an player ṭha an chelh bakah player thar an lak ve zel avangin beiseina an nei sang tawh hle.

Kum 50-a upa Gazidis chuan, "Season tin mai hi a harsa tial tial tih chu ka hria; mahse kan squad pawh a ṭha telh telh ve bawk. Tuna kan team ka en hi chuan champion sawi ngam tur kan ni in ka hria," a ti.

An manager Arsene Wenger chungchang sawi chhunzawmin Gazidis chuan, "Arsene-a hnatawh hi hmuh hmaih theih a ni lo. Ani hi he club enkawl tur chuan a ṭha ber a, ani ho hian kan champion leh ang. Chamion tur chuan kan elpui dang zawngte aia kan ṭhat a ngai a, chutihrual chuan vanneih a ngai ve bawk," tiin a sawi.