I League khelh nan RG Stadium a tha tawk

All India Football Federation (AIFF) aiawhte chuan Rajiv Gandhi Stadium, Mualpui chu I League khelhna turin a ṭha tawkah an ngai.

AIFF aiawh mi pathumte hian Thawhlehni khan RG Stadium a hmunah an tlawh a, nimin khan PWD minister leh Mizoram Football Association president ni bawk Lal Thanzara chu a office-ah hmuin I League khelhna tura an ruahmanna kalpui dan chu a ṭhat tawk thu an hrilh.

Hetihlai hian inbuatsaihna kal mek chu a hun taka an zawh ngei a ṭul thu an hrilh a; November-ah endik tura lo kal leh an tum.

Inbuatsaihna

AIFF aiawh hian Indranil Das, Assistant Manager, Club Licensing & League Operations; Akshay Rohatgi, Manager, I-League leh Savio Medeira, Manager Coaching and Academy-te Aizawlah an lo kal a, I League thlen dan tura hmalak dan an enfiah.

PWD enkawltu minister Lal Thanzara chuan, "Rajiv Gandhi Stadium hi siam mek a la ni a, siam zawh hunah chuan changtlung tak a ni ang. Tunah hi chuan a chanve vel chiah siam a la ni a, heti chung hian January, 2016-a Aizawl FC-in I League an khelh theihna tura a ṭul apiang tih kan tum a, kan hlawhtlin ngei kan beisei," tiin AIFF hotute hi a hrilh.

Stadium a ṭha tawk

Indranil chuan, "Tuna in rua­hman anga in siam thei a nih chuan I League atan mai ni loin Asian Football Confederations hnuaia inkhelte pawh a thlen theih ang a, international match thlengin a thlen theih ang," tiin a sawi.

RG Stadium hi ruahmanna anga sak zawh a nih chuan a ṭha dawn, tuna a awm dan erawh a la ṭha tawk lo. I League thleng turin kuminah ngei RG Stadium chhung chei hna chu zawh hman a ṭul dawn a ni.

Thawhṭanni khan RG Stadium hi AIFF lam bakah Mizoram Football Association leh Aizawl FC lam hotute'n an endik a, PWD aṭangin engineer leh architect lamin an vil reng bawk.

He khelmual hi a zavaia zawh a nih hunah chuan mamawh hrang hrangte awm kim vek tura duan a ni; nimahsela tunah hian a hna chanve vel chiah khawih a la ni a, chuti chung chuan I League khelhna tura mamawh dressing room, inthiarna, inbualna, conference room, media room, VIP room leh room pawimawh dangte chu kumin chhunga siam zawh vek tura ruahman a ni.

Lammual aiin RG?

AIFF lam chuan Lammual chu a awmna hmun laili hle mah se khelmual pahnih zingah RG Stadium lam an duh zawk tih an sawi a, chutih rualin khelmual hman theih pahnih buatsaih chu ṭha an tih thu an sawi.

MFA Secretary Lalnghing­lova Hmar chuan I League thleng thei tura stadium-a siam belh ngaite a sawi a; PWD lam pawhin kumin chhung ngeia zo hman turin AIFF lam mamawhnate chu ngaih pawimawh hmasakah an neih tur thu an sawi.

Mizoram chhunga I League khelh theih nan sorkar leh MFA bakah Aizawl FC lamin theihtawp an chhuah a; harsatna lian a awm thar a nih loh chuan January, 2016-ah India rama football club-te inelna sang ber I League hi Aizawlah a khelh theih dawn niin a lang.