PSG-in Angel Di Maria an duh
French club lian Paris Saint-Germain manager Laurent Blanc chuan Angel di Maria chu a club khelhna Manchester United-in hralh an phal a nih phawt chuan lakluh an duh thu a sawi.
Argentine winger hian August 2014 khan British football transfer-a man to ber ni turin pound maktaduai 59.7-in Old Trafford a pan a, mahse English club-ah hian Real Madrid-a a hlawhtlinna a chhawm thei lo.
Season ṭan tir lamah zia viau mah se inhliamin a tlakbuak vangin Di Maria hian ngai a awh hleithei lo a, insiamṭhat tum Manchester-in hralh mai an pawi ti lo nia sawi a ni. Club lian tak tak nen sawizawm a ni a, chung zinga thawm nei lian ber pawl chu sum lama buaina nei lo PSG an ni.
United defender hlui Blanc chuan, "Di Maria-a dinhmun hi a chiang lo hle. Ka sawi duh chu English club lian ber pawlah a khel a, a club khelhna hian nikum lawkah an lei a ni," tiin Di Maria chu United-in chhuahtir an phal a ring lo.
French manager chuan sawi chhunzawmin, "Di Maria hi United-in chhuah an phal a nih phawt chuan club lian tak takin lakluh an duh dawn a, PSG hi chung club zinga mi chu kan ni. Amah duhtu an tam avangin chhuak dawn pawh nise chan a harsa dawn a, hemi hre ran chung hian Di Maria hi kan thlithlai reng a ni," tiin Argentina international chu an enthlak reng thu a sawi.