Vidal chungchangah Bayern leh Juve an inrem
Chilean midfielder Arturo Vidal chuan Bayern Munich a zawm dawn, Bundesliga club leh Juventus te hi pound maktaduai 25.9-in an inrem a, a chet ṭhat dan a zirin pound maktaduai 2.1-a pung leh thei tura tarlan a ni.
Kum 28-a upa midfielder Vidal hian Bayern-ah hian kar khatah £90,000 a hlawh ang. Vidal hian Juventus tan season li a khel a, Serie A-ah vawi li a champion.
Vidal hian Chile club Colo Colo-ah bul a ṭan a, 2007 khan Bundesliga club Bayer Leverkusen-ah a lut. Leverkusen tan season li chhung a khel a, hetih hunlai hian Bayern-in lak luh an tum tawh a, Vidal hian inremna a bawhchhia nia sawi a ni.
Bayern chairman Karl-Heinz Rummenigge chuan, "Jupp Heynckes khan Vidal hi a duh takzet a, lak luh tumin theihtawp kan chhuah. Leverkusen-in Vidal-a'n kan bula khelh a duh lo tih a sawi. Amaherawhchu tunhnua kan hriat leh dan chuan club khan Bundesliga club thoa a luh kha an remti lo a ni," tiin lak luh an lo tum tawh thu a sawi.
Copa America-a Chile champion puitu Vidal hma hian Bayern-in Shakhtar Donetsk aṭangin Brazilian attacking midfielder Douglas Costa an la lut tawh a, Manchester United-ah Bastian Schweinsteiger an chhuah tawh thung.
2015 Champions League finalist Juventus-in Carlos Tevez leh Andrea Pirlo te an chhuah tawh a, Paul Pogba chu Barcelona nena sawi zawm a ni bawk. Serie A champion hian Mario Mandzukic, Sami Khedira leh Paulo Dybala te an la lut a, Vidal thlak turin Schalke midfielder Julian Draxler an dawr niin tarlan a awm bawk.