Khatla TBL an chak nghal: An hmaah Zarkawt BCA

Sharda University Mizoram Super League X match hmasa berah Khatla TBL an chak nghal a, MSL vawi thum champion tawh hian Bungkawn LB Associates chu 97-67 ngawta hnehin, champion an tum tih an pholang nghal.

Khatla TBL hi zanin dar 8:30-ah an inlan lehnghal dawn a, MSL-a champion ngun ber Zarkawt BCA an hmachhawn dawn - team pahnih an inhal a, veng mipuiin an ṭawiawm ṭhat ṭhin bawk avangin zanin inkhel boruak pawh a sang dawn tih a chiang a, fans ngahin boruak thui tak a hril ang.

TBL chak zanah kai thar Zemabawk Basketball Club inlan vein, anni aia tawnhriat nei ṭha zawk Champhai Basketball Club chu 88-76 in an hneh. Champhai BC hi vawiinah an inlan lehnghal dawn a, tlai dar 5:30-ah kaithar tho Electric BC an hmachhawn ang.

R. Dengṭhuama Indoor Stadium, Mualpuiaah inelna hi neih niin, a hmuna en duh tan, courtside ticket bik hi online-in triket.in-ah a lei theih a, a dang zawng erawh a hmunah lei tur a awm thung - Zonet chuan Rihnim leh YouTube lamah live-a en theih turin an pe chhuak bawk.

Kha le Khatla!

Khatlain MSL-a Zarkawt BCA rorelna tihtawp an duh a, MSL 1&2-a player-coach ni chunga champion puitu H. Laldinsanga (Mapuia) chu an club enkawl turin an la lut - Mapuia hoa nomawi chawi leh ngei an tumruh hle.

Inkhelh hmain Mapuia ṭawng fimkhur viau mah se, khelmualah TBL thiam bikna a lang a, quarter khatna pawh 28-6 ngawtin an la nghal a, team pahnih an inthlau tih a chiang.

Bungkawn hian quarter hnihna 17-15 in rawn la ve mah se, TBL-in 24-19, 30-25 a quarter hnuhnung pahnih rawn la lehin, 97-67 ngawtin an chak a, khelmuala an theihna hmangin BCA an vau lawk.

Khatla TBL tan Ohio tlangval Nary James a langsar nghal a, MSL-a a match hmasa berah point 21 ngawt a team tan a hlawh chhuak nghal - Emmanuel VL Awmpuia (16 points) leh Vanlalṭhazuala (15) te pawh sawi hmaih an thiang lo.

Champhai an tlawm

Tun season-ah MSL Board-in Mizorama basketball inelnain ngaihhlut a hlawh lehzual nan hma an la a, round khat chu Champhaia khelh turin an ti - mahse, Champhai mipui phurna thlen turin an match hmasa berah Champhai BC an chak zo tlat lo.

Champhai tan American tlangval Dareial Corrione Franklin langsar viau mah se, a ṭhianten an thlawp ṭha tawk lo - Franklin hian point 26 ngawt a score nghal a, Lalropuia (18) leh K. Liandinga (13) tih loh, player dang zingah an team tana point 10 score kai thei an awm lo a, kai thar lakah Champhai club an tlawm.

Aizawl pawn aṭanga tel awmchhun Champhai hian Zemabawk hi an pawt thla teuh hle - quarter tawp ber 19-8 in an la a, mahse, quarter thumnaa 12-23 ngawta an lo hnufual tawh chu tuarin, a tawpah 88-76 in an chak lo.

Zemabawk tan Mizo tlangval Lalrozama chu player langsar ber niin, point 22 ngawt a score a, 6ft 11in-a sang Kenneth Perkins Jr. (19), Nitish Beniwal (15) leh Lallianmawia (11) ten an thlawp ṭha bawk a, MSL-ah an tlangngel nghal hle.