German football a ngai bawkin a kal leh ta!

Bayern Munich chu German football roreltu an ni char char ṭhin a, season hmasa khan Xabi Alonso enkawl Bayer Leverkusen chuan he thawnthu hi an ti danglam, mahse tunah chuan an kal dan pangngai bawkin an kal leh ta.

Vincent Kompany kaihhruai Bayern Munich chuan Thawhlehni zan khan Leverkusen chu 2-0 in an hneh, inkhel hmasa nena belh khawmah 5-0 a chakin Champions League quarterfinal an lut.

Bavarians hian Bundesliga lamah Alonso naute chu an nomawi kawl lai an chhuhsak ngei dawn niin a lang ta bawk a, champion châka tuihal rei tawh Harry Kane tan season duhawm a ni ngei dawn niin a lang ta.

Goal thum neisa a inlan an nih avangin Bayern hi chak chiang tura rinkai sa an ni a, chawlhlawk an hman hnu lawkah Kane chuan freekick aṭanga ball kang kal chu la thlain goal hmahruai a khung.

England captain Kane hian a hnuah Alphonso Davies tan a siamsak bawk. Michael Olise leh Kingsley Coman ten goal dang khung theihna remchang nei mah se an vanneih zan a ni lo thung a ni.

Alonso-a'n kerek hliam Florian Wirtz a chhawr thei lo a, an goal nawr a na tawk lo. Remchang hmutu Jeremie Frimpong pawhin Bayern goalkeeper Jonas Urbig a paltlang thei lo, Patrik Schick pawhin hun ṭha a khawhral bawk.

Bayern striker Kane chuan, "Bayer Leverkusen lakah 5-0 in kan chak thei a, hei hian team ṭha kan nihzia chu a takin a lantir. A nihna takah chuan 3-0 a hmahruai sa chung chuan inkhelh hi a awlsam lo, chutiang karah chuan ṭha takin kan khel," a ti.

Bavarians hian quarterfinal-ah chuan Inter Milan an hmachhawn dawn. Serie A champion hi tun hnai deuh mai a Champions League final khel phak an ni a, awlsam taka paltlang thei tur chi an ni lo ang.