Maresca faktu Jadon Sancho

Jadon Sancho chuan Chelsea manager Enzo Maresca a dah sang hle a, team mai ni loin chhungkaw nuam tak an din niin a hriat thu a sawi a, boruak nuam tak hnuaiah an inkhel tih a sawi bawk.

England international Sancho hi Manchester United lamah a tlatlum lo a, inkhelh tam bakah boruak thar tawn beiseiin Chelsea a pan; Blues tan hian a duhthusam ang thlapin khel rih lo mah se nuamti takin a inkhel a ni.

Sancho chuan, "Coach chungah rinna kan nghat lian em em a, ani chuan kan tih tur leh hmabak te chiang takin min hrilh zel a ni. Thawk leh khatah a danglam hluai theih lo a, mahse zawimuanga hmasawn hi a nghet duh zawk.

"Kan tan chuan Chelsea hi chenna In ang mai a nuam a ni a, player leh coaching staff kan inpawh em em avangin nitin mai hi kan tan chuan hlimna ni a ni thei zel, hetiang boruak siamtu chu Maresca a ni," tiin a sawi.

Hmabak an neih thu sawi zuiin Sancho chuan, "Kan squad-ah hian player naupang tak tak an awm, chutihrualin ṭhenkhat chuan tawnhriat an ngah tawh hle thung.

"Theih ni se la chuan season tharah hian Champions League khelh phak kan duh, kawng erawh a harsa hret dawn thung. Season kan hman hmabak zawng zawngah hian 100% kan pek a ngai dawn a ni," tiin a sawi.

Chelsea hi Premier League table-ah palina an ni mek, champion lai Manchester City leh an chung chiah a awm Nottingham Forest te nen hmunruak an inchuh dawn a, a hautak chho khawp ang.

EPL match hautak an khelh hmain Europa Conference League an khelh leh phawt a ngai dawn, zanin dar 1:30 hian Copenhagen an lo mikhual ang. Blues hian an intawn hmasakah 2-1 in hnehna an chang tawh a, quarterfinal lut tur chuan goal chhuah loh a tawk tihna a ni.