Lungleiah inhnek hmuhnawm awm dawn

A vawi khat nan Lungleiah professional boxing huaihawt a ni dawn a, WBC Youth champion Laldinsanga'n ram dang boxer bitumin khawtual boxer ṭha F. Lalthanliana Junior a inlan dawn bawk.

High Power Committee (HPC) Lunglei chuan an khaw tlangval leh Mizo professional boxer zinga hlawhtling ber ni mek Dinsanga inhnek huaihawt turin hma a la a, LPS Promotion nen thawk dunin zan hnih awh turin ruahmanna an siam a, April 24-25-ah inhnekpui tham tak buatsaih an tum a ni.

Pro Boxing a luh chilh aṭanga vawi 10 a inhnek tawhah Dinsanga chak vekin February 7 khan Bangkok-ah awlsam takin Sarawut Jiamthong a hneh a; a inhnek hnuhnun ber niin nikum November 24 khan Bangalore-ah WBC Youth bantamweight title a chuh a, Michael Decardi Nelson-a lakah phu takin a chak.

Pro Fight middleweight 2024 final-ah Electric Veng Lunglei tlangval Thanliana'n champion lai C. Lalhruaitluanga, Chawngtlai a hneh ve thung a, a vawi khat nan Pro Fight champion a nih aṭangin a inhnek zui leh rih lo a, Lungleiah a vawi khat nan pro boxing huanga chak tumin a inlan dawn a ni.

Leitlangpuia inhnek tur zingah WBC India champion Vanlalawmpuia a tel dawn bawk a, Khuangthing boxer hian February 7 khan Thai khawpuiah Supachat Sukonthamanee hnehin Mizo zinga pro boxing khel tam ber a ni a, vawi 15 a inhnek tawhah tum 11 chakin a inhnek hnuhnun tum ngaah a chak vek a ni.

Zan hnih chhungin zan khatah inhnek vawi nga emaw vawi ruk emaw ve ve awm tura tih a ni a, Mizo boxer thate bakah Indian leh ram dang boxer-te an inlan dawn. WBC India aṭangin boxrec-a ziak lut tur supervisor chah luh a ni ang a, Lunglei khawpuiin a la tawn ngai loh tawngin Aizawl tih loha Mizoram chhunga professional boxing thleng hmasa ber a ni dawn a ni.