Lalnaua enkawl Vengthar an vul

MFA Cup 2025-ah nimin khan Khawzawl club Vengthar FC-in Aizawl club Kanan FC 4-0 in an sawp. PC Lalchhanchhuaha (Lalnaua) enkawl Vengthar FC leh MLS FC (Lawngtlai) ten semifinal an lut. Team pahnih hi group match hnuhnung berah March 14, Zirtawpni hian an inkhel ang a, group hmahruaitu an zawng ang.

Chhangphut Field-a inkhelah hian Vengthar FC tan draw a pawi loh laiin Kanan tan chak ngei a ṭul a, season thara MPL khel tur Aizawl club hi an chetsual avangin an hna a harsa sawt bawk. Minute 37-naah Kanan defender back pass sual vangin Lalrintluanga'n (Tutu-a) chance ṭha bik a nei a, keeper a bum hnuah awlsam takin a khung.

Second half-ah pawh Khawzawl club an che ṭha chhunzawm a, dinglam kil aṭanga Vanlalnunpuia ball vawrhluh pawp chu Kanan keeper-in a dang thei lo a, minute 55-naah 2-0 a ni. Kanan beiseina a bo a, hun tawp lamah goal hnih dang an chhuah belh.

Minute 85-naah Lalkrawsmawia'n corner kick aṭanga ball kal chu a tauh lut a, injury time-ah Kanan keeper pet chhuah ṭhat loh chu Vanlalhruaia'n chang fuhin MPL-ah pawh tawnhriat nei ṭha player Mahruaitea hian chak nemnghehna goal a khung.

MFA Cup 2025-ah MPL khel tur club pahnih MLS FC leh Kanan FC te an tel a, Aizawl District champion Kanan erawhin beisei an pha lo a, match khat khelh hmabak la awmah an tla. MLS FC erawhin semifinal an lut thung.