Paul hnehtu Medvedev

Indian Wells khelh laiah Daniil Medvedev chuan quarterfinal a lut - Russian tlangval hian nimin inkhelah Tommy Paul chu 6-4, 6-0 a hnehin a thiam zual pariat zingah a inhlangkai a ni.

Ruah sur vangin inkhelh hun sawn tlai a ni a, zan dar 10:00-ah match an ṭan thei chauh; American tlangval Paul-a'n tihsual a ngah laiin a khingpui Medvedev erawh a dingnghet ṭha hle thung.

Seeded pangana Medvedev chuan, "Tun hma pawhin match sawn tlai hi chu ka lo tawng tawh, tun ṭum ami erawh kan nghak rei deuh a, rilru leh taksa a nghawng hman," tiin a sawi.

A match lehpekah chuan Medvedev hian Arthur Fils a hmachhawn ang, inkhel dangah Fils hian a khingpui Marcos Giron chu 6-2, 2-6, 6-3 in a hneh ve thung a, anni inkhel pawh hi a tir lamah ruah sur vangin an buai ve bawk.

Hmeichhe inelna lamah Iga Swiatek chuan Karolina Muchova chu 6-1, 6-1 in a hneh ve thung a, tun inelna neih laiah Swiatek a khel ṭha thei hle, match thum a khelh tawhah game ruk chiah a la hloh hial a ni.

Seeded pahnihna Swiatek hian hnehna chang turin minute 57 chauh a mamawh a, a match lehpekah chuan Zheng Qinwen nen an intum ang - Olympic champion Zheng Qinwen hian Marta Kostyuk 6-3, 6-2 in a hneh ve thung.