Chanmariin Zarkawt an hre lo!

Sharda University Mizoram Super League X a ngaihnawm chhunzawm zel - Nilaini zan khan Chanmari BC chuan champion lai Zarkawt BCA chu 77-75 in an hneh a, MSL-a nomawi vawi nga chawi tawh team an hre lo.

Team pahnih an inngam tawk hle - Chanmari hian quarter khatna 25-19 in an la a, Zarkawtin quarter thumna (15-20) leh quarter lina (18-23) in an rawn la thung a, beiseina an nei thar.

Mahse, quarter tawp berah Chanmari hi 19-13 in a chungnung zawk an rawn ni leh ta daih a, uiawm takin Zarkawt BCA an tlawm - nizan khan Khatla TBL nen an inhmachhawn lehnghal a, an result erawh kan hre hman lo.

Chanmariin US aṭanga an chah luh Gregoryshon Magee a hmuhnawm nghal a, point 24 ngawt a nei nghal - Lalnunsanga pawhin point 20 neiin, Chanmari tan a thawhhlawk hle.

Zarkawt tan Zonunsanga'n point 22 neiin, champion lai tan player langsar ber a ni a, Marquis Cunningham (15), Lalnunpuia Renthlei (14) leh Lalrina Renthlei (10) te pawh che ṭha viau mah se, an team erawh an chakpui zo ta lo.

Nilaini zan inkhel dangah kai thar pahnih inkhelin, Saron BC chuan 80-72 in Electric BC an hneh a, Saron par an vultir - Saron tan T. Lalhriatzela'n point 22 neiin a langsar nalh a, Electric tana AS Sarath (23) leh Lalhlunmawia (21) chet ṭhat a tawk zo lo a, an tlawm.