Real hmaa ding tur Arsenal

Arsenal-in UCL last 16 first leg-ah PSV 7-1 ngawtin an sawp a, Thawhlehni zan second leg-ah player indah ṭha ṭhenin Emirates Stadium-ah 2-2 in an inhnehtawk. Gunners hian quarterfinal-ah Real Madrid an hmachhawn dawn a, London club hian Los Blancos lakah tlawm an la nei lo.

Mikael Artetea hote hi second leg-ah pawh team ṭha zawk an ni a, minute rukna lekah Oleksandr Zinchenko-a'n box pawn aṭangin goal ropui a khung. Mahse, minute 18-naah Ivan Perisic hmangin PSV-in siphurh an sut a, Arsenal tlarhnung a pherh.

PSV hmuhnawm chhunzawm mah se Gunners bawkin goal an khung hmasa. Minute 37-naah Raheem Sterling-a cross chu Declan Rice-a'n a tauh lut a, first half-ah 2-1 a ni.

Second half-ah pawh goal chance a tam a, minute 70-naah Couhaib Driouech-a'n cool zetin Arsenal keeper David Raya a pet khum a, goal class a ni. Goal chance dang awm mah se goal dang luh tawh loin 2-2 in inkhel a tawp.

Arsenal-in Real Madrid an hmachhawn dawn a, an hriatchhuah nghal tur chu kum 2006-a UCL last 16-a an inhmachhawn ṭum kha a ni. Gunners hian Zinedine Zidane, Ronaldo, David Beckham, Sergio Ramos, Roberto Carlos leh Ilker Casillas te telna chu Thierry Henry goal ropui hmangin an hneh.

Henry hian halfway line pelh deuh aṭanga khalh tlangin minute 47-naah chakna goal khung a, Santiago Bernabeu an luhchhuah. Mikel Arteta hoten hun kal tawha thil thleng hi thlen nawn tir an tum ang.