MFA Cup: Kanan vanduai, Electric Veng vannei

MFA Cup 2025-ah semifinal lut tur a hriat kim a; Serchhip aiawh Thangzuala Memorial FC, Kolasib aiawh Electric Veng, Khawzawl aiawh Vengthar GSA leh Lawngtlai aiawh MLS FC ten semifinal an lut. Vawiin hian group match hnuhnung ber khelh a ni ang a, chawhma dar 10:00-ah Vengthar GSA leh MLS FC ten group B hmahruaitu tur an zawng dawn.

Nimin inkhelah Thenzawl club Thangzuala Memorial FC-in semifinal lut turin goal an mamawh tam tih an hria a, Mamit club FC Bazar chu 6-0 in an sawp. Johny Lalremruata'n hattrick a siam a, Eric Remruatpuia'n goal hnih khungin Vanlalthanga'n goal khat a khung bawk.

Goal ruk ngawt an khung avangin Thangzuala Memorial FC-in semifinal an lut a, Siaha United-in beiseina a tawp nghal. Inkhel hnuhnung zawkah Champhai club Kanan SC-in Kolasib club Electric Veng an hmachhawn a, mualneitu lamin F. Malsawmtluanga leh Biakhmingthanga hmangin 2-0 in hma an hruai hmasa. 2-0 a nih lai hian Kanan leh Electric hi goal difference bakah goal for thlengin a inang vek. A tawpah erawh Electric Veng an vannei a, Lalremtluanga'n minute 88-naah goal khungin 2-1 in chak lo mah se goal khat hi semifinal luh nan a tawk.