Hmalam panin Alcaraz a kal zel

Carlos Alcaraz chuan a vawi thum nan Indian Wells nomawi chawi a tumruh hle a, nimin zing khan a khingpui Grigor Dimitrov chu straight set hmanga hnehin quarterfinal-ah a inhlangkai.

Court 1-a inkhelah thli a thaw nasa a, ni danga match an khelh nen a boruak a inang lo. Mahse, boruak danglam deuh karah pawh Alcaraz a dingnghet hle, seeded 14-na hi 6-1, 6-1 in a hneh.

Dimitrov hian an intawn hnuhnung pahnihah Alcaraz a hneh a, a zawna vawi thum hneh theitu nih a tum hle. Amaherawhchu, a inkhelh thiamna hmunah world number 3 Alcaraz chu hneh mai theih a ni lo.

Roger Federer leh Novak Djokovic te hnung zui a Indian Wells vawi thum champion tum Alcaraz chuan, "Match tinah hian zirlai ka zir belh zel a, tun ṭumah pawh khan tun hma lama ka tawn ngai loh thleng te a awm.

"Champion tur chuan ni tin hmasawn zel a ngai," a ti a, a vawi thum nan a champion ngei dawn em tih erawh a sawi thei bik lo thung, a match lehpekah chuan Francisco Cerundolo a tum ang.

Last 16 inkhel dangah Francisco Cerundolo hian Alex de Minaur 7-5, 6-3 in a lo hneh ve thung a, Argentine player hi seeded 25-na ni mah se player ṭha De Minaur laka a khelh dan en chuan Alcaraz tan hmachhawn a awlsam dawn lo.

Ben Shelton pawhin quarterfinal a lut - Shelton hi kum 22 mi niin American player zingah chuan Andy Roddick (2004) hnua Indian Wells last 16 paltlang leh thei naupang ber a ni hial.

Nimin zing khan Shelton hian darkar khat leh minute khat chhungin Brandon Nakashima chu 7-6 (6), 6-1 in a hneh a, Nakashima nen hian vawi nga an intawn tawhnaah set a la hloh miah lo a ni.

Jack Draper pawh a kal zel - British number 1 hian world number 4 Taylor Fritz chu 7-5, 6-4 in a hneh, a vawi khat nan Indian Wells quarterfinal a lut; semifinal thleng tur chuan Ben Shelton a hneh leh a ngai ang.