Celtics hnehtu Thunder

Nimin zing NBA regular season inkhelah Oklahoma City Thunder chuan Boston Celtics 118-112 in an hneh a, playoff khel turin an tling nghal a, Thunder hian chawlh zai an rel lo, an chak chho zel tihna a ni.

TD Garden-a inkhelah hian Thunder tan Shai Gilgeous-Alexander chuan point 34 ngawt a nei a, a thawhhlawk hle. Point 23 neitu Chet Holmgren bakah Cason Wallace (14) leh Luguents Dort (13) ten an thlawp ṭha hle bawk.

Western Conference hmahruaitu Oklahoma City Thunder hian season kal laiah vawi 54 tehmeuh hnehna an chang tawh a, ṭum 12 chauh chak loh la neiin a thiam zual inelna playoff khel turin an tling fel tawh a ni.

Chak lo mah se Boston Celtics pawh Eastern Conference-ah pahnihna an ni mek tho a, season kal laiah ṭum 19 a chak lohna a nih rualin ṭum 47 an chak tawhna chu dinhmun ṭha taka din nan a tawk.

Basketball inelna ngaihhlut NBA-ah hian team 30 an awm, team 15 ve ve in Eastern Conference leh Western Conference-ah ṭhenhran an ni a, regular season an hman zawhah conference pahniha a sang pariat ten playoff an khel ṭhin.

Regular season bikah hian team pakhatin match 82 ngawt an khel ṭhin, anmahni conferrence-a mi te bakah conference lehlam ami te nen an inkhel kual ṭhin bawk a ni.