Axelsen leh Sindhu an tla nghal

Badminton inelna ngaihhlut zinga mi All England Championship khelh laiah, mipa player ṭha Viktor Axelsen chu hneh nei loin a tla nghal a, a chak loh hnuah a chawl rih dawn tih a sawi nghal.

India chhuanvawr PV Sindhu pawh a chak lo - Olympic medal vawi hnih vaw chhuak tawh Sindhu hian Kim Ga Eun a ngam loh avangin a zinkawng a tawp ve bawk.

Denmark tlangval Viktor Axelsen hi champion tura rinkai a ni, mahse Taiwan tlangval Lin Chun-Yi lakah 21-19, 13-21, 21-11 in a chak lo, a vawi thum nana All England title lak a tum chu a hlawhtling ta lo.

Kum 31 mi Axelsen chuan, "A tir aṭangin ka khel fuh tawk lo. Birmingham ka thlen tirh aṭangin duhthusam angin boruak a awm thei lo a, engkim sawi vek erawh a remchang lo. Hahchawlhna hun ka mamawh a, tunhma aia ṭha zawkin lo kir leh ka tum ang," tiin a sawi.

Mipa singles inkhel dangah Olympic champion An Se-Young erawh a chak - South Korean tlangval hian Chinese player Gao Fang Jie chu 21-16 21-14 in a hneh.

Hmeichhe inelna lamah India tan chuan Sindhu hi beisei sanna a ni, mahse round of 32-ah Sindhu hian South Korean nula Kim Ga Eun chu 21-19, 13-21, 13-21 in a hneh lo.

Utilita Arena Birmingham-a inkhelah Sindhu hian game hmasa berah pawh 20-12 zeta a hmahruaina pawh a ti thlawn ṭep a, darkar khat an inkhelh tlin meuh chuan game hnuhnung pahnih a hloh.

Indian player zingah Rohan Kapoor leh Ruthvika Shivani Gadde te an chak, anni pahnih hi mixed doubles huanga inlan niin Chinese Taipei mi Ye Hong Wei leh Nicole Gonzales Chan te inkawp chu 21-10, 17-21, 24-22 in an hneh.