Bencic lakah Gauff a tla

Indian Wells khelh laia hmeichhe inelnaah Coco Gauff chuan last 16 a paltlang zo lo, nimin zing khan seeded pathumna Gauff hi Belinda Bencic lakah 3-6, 6-3, 6-4 in a chak lo.

American nula Gauff hi champion tura rinkai zinga mi a ni phak a, seeded pathumna pawh a ni. Mahse, chak chiang sa a sawi theih loh, wildcard hmanga inlan lakah a tlawm ta si a ni.

Swiss nula Bencic chuan, "Ṭha taka khel turin theihtawp ka chhuah a, inbuatsaihna ka neih ang taka ka khel chhuak thei hi ka lawm, khelmual sir aṭanga min thlawptu tam tak te khan chakna min pe bawk," tiin a sawi.

Inkhel dangah Madison Keys a chak thung - tun hnaia khel ṭha tluang tak Keys hian Donna Vekic chu 4-6, 7-6(7), 6-3 a hnehin quarterfinal a lut a, a match khelh hnuhnung 15 zetah hnehna a chang vek.

World number 1 Aryna Sabalenka pawhin harsatna lian tham a tawk lo - Belarus nula hian Sonay Kartal chu 6-1, 6-2 in a hneh, a match lehpekah chuan Jasmine Paolini hnehtu Liudmila Samsonova a hmachhawn dawn a ni.