A vawi 21 nan Roger Federer

Roger Federer chuan Australian Open a khelh tawh vawi 21-ah second round a paltlang vek. Swiss star hian vawiin tlaiah tualchuung tlangval John Millman nen third round an khel chhunzawm leh 

nghal ang.

Nilaini zan khan Rod Laver Arena-ah Federer hi a inlan a, darkar khat leh minute 32 chhungin a khingpui Filip Krajinovic chu 6-1, 6-4, 6-1 in a hneh. Grand Slam vawi 20 champion tawh hian vawi 42 ngawt winners a vaw chhuak thei. A ṭum sarih nana Australian Open champion nih tum Federer chuan, "Season ṭan dan duhawm tak a ni, inelna hmachhawn tura ka thawhrimna kha tunah chuan a chhanna ka hmu mek zel. Thui tak thlir loin, match khelh hmabak pakhat zel ka ngaihtuah ang," tiin a sawi.

Inkhel dangah seeded palina Daniil Medvedev chuan Pedro Martinez chu 7-5, 6-1, 6-3 a hnehin second round a paltlang. Russian tlangval hian vawi 19 ngawt aces a vaw chhuak thei a, a inkhelh thiamna hard court a nih avangin a thlen san a rinawm. Nimin khan second round khelh chhunzawm a ni a, seeded pangana Dominic Thiem chuan fiahna hautak a paltlang. Austrian tlangval hian wildcard hmanga inlan Alex Bolt lakah set hmasa la mah se set hnih a hloh zawn - a tawpah erawh 6-2, 5-7, 6-7(5), 6-1, 6-2 in a vannei zawkah a ṭang.

Player theihna nei sang, mahse Grand Slam quarterfinal pawh paltlang thei ngai lo Alexander Zverev pawhin nimin khan hnehna a chang. German tlangval hian Egor Gerasimov chu 7-6 (7-5), 6-4, 7-5 in a hneh - ATP Finals 2018 champion tan kuminah hun ṭha a inhawng leh mek.