United tlar hmaah Van Gaal a lungawi chiah em?

Manchester United-in cap­tain Wayne Rooney lakah rinna an nghat a, manager Louis van Gaal chuan forward an lak belh tawh lo a nih pawhin a tlarhma neih danah a lungawi thu a sawi.

Dutch manager Van Gaal chuan, "Tlarhma lama kan player neih chhah lamah buaina tur kan neiin ka hre lo, Rooney kan nei alawm. Kan captain hian striker position-ah a khel thei a, nikum khan media lamin striker-a khelh tir turin minti nasa a, an thu kan awih dawn. Tunah hian (Javier) Hernandez leh (James) Wilson bakah mipui barakhaih tur kan la lut thei bawk," tiin Club America an hmachhawn zawhah a sawi.

Kum 63-a upa Van Gaal hian season thar atan player pali lakluh nan pound maktaduai 83.1 bawr vel a hmang tawh a, chutichung chuan defender leh striker lei nan pawisa hman tur a la nei tho. Hei vang hian Van Gaal hian tlarhmaah striker hming nei zawk lakluh a duh ang.

Nikum khan United-in khawvel huapa striker lar pathum Robin Van Persie, Radamel Falcao leh Rooney te an kawl a, league-ah goal 62 chauh khungin goal khung tam ber Manchester City an phak lohna chu goal 21 lawih a ni.

Van Gaal-a duh loh Colombia striker Falcao hi Chelsea mana­ger Jose Mourinho-a'n a la lut nghal a, Arsenal captain hlui Van Persie-a'n Turkish club Fenerbahce a pan thung. Chelsea tan Falcao a chet ṭhat chuan United leh Van Gaal mualpho theih­na a ni a, hei vang hian Dutch manager hian season thar­ah tawnhriat nei lo striker chunga innghah tawp a tum lo ang.

United tlarhma

Season hnuhnung pahniha United top scorer chu Wayne Rooney a ni a, goal 14 leh 17 a khung. Rooney hi 2009-10 season khan Sir Alex Ferguson-a'n tlarhmaah rinrawlah a hmang a, league-ah goal 26 khungin season pumin goal 34 a khung - a career-a season khat chhunga a khung tam ber a ni.

United player thar Mem­phis Depay hi Van Gaal-a'n tlarhmaa a chhawr theih thu a sawi a, Club America nen an inkhelh ṭumin Rooney hnung chiahah a hmang.

Amaherawhchu Rooney thachhangdawltu tak erawh Javier Hernandez a nih a rin­awm, Chicharito hian nikum khan loan-in Real Madrid a zawm a, dar ruh tliak vangin CONCACAF Gold Cup-ah Mexico tan a inlan thei lo. Van Persie leh Falcao te awm vangin Van Gaal-a'n a chhuahtir a, Dutch manager hnuaia hming chher chawp tur a la ni.

United rawlthar kum 19-upa James Wilson-a'n club tana a match hmasa berah goal hnih a khung nghal a, beisei a pha chhunzawm lo.

Player thar chu

Van Gaal hian a tlarhma neih danah a lungawi thu sawi mah se a nihna takah chuan a duhkhawp player a la nei lo tih a chiang.

Media lam chuan Van Gaal-a'n mipui barakhaih tur player a tih hi an inrinsiak a, player ṭha hming an inlam siak a ni ber.

Real Madrid forward Gareth Bale te, Bayern Munich duo Robert Lewandowski leh Thomas Muller te, Barcelona winger Pedro te leh PSG forward Edinson Cavani te chu hming lamrik zingah an tel. Cavani agent erawhin Uruguayan forward hi PSG-ah a lungawi a, chhuah a tum lo niin a sawi.

Transfer boruak a ngaih­nawm a, sum hlutna hre lo Man­chester United chu a ti­ngaih­nawmtu an ni. Van Gaal-a'n pound maktaduai 83 chuang a hman hnuah player awh zawng a la ngah hle.