Walcott-a contract thar a hnai

Arsenal forward Theo Walcott chuan contract thar ziah a duh thu a sawi; hetih rual hian contract thar ziak tura a hmanhmawh loh thu a sawi bawk.

Kum 2013 khan Wal­­cott hian kar khata £90,000 hlawh turin kum thum leh a chanve daih contract a ziak a, tuna a contract neih laiah chuan Emirates Stadium-ah kum khat chiah hun a nei tawh.

England international hian a contract a pawhsei mai loh bakah club nen in­biakna an neih mai loh avangin club tam tak­in an ngaihven hman. Wal­cott duhtu zingah hian Livepool chu hming lang­sar ber an ni nghe nghe.

Kum 26-a upa Wal­cott chuan, "Tunah hian ka agent leh club-in inbiakna an nei; Gunners tana khelh hi a nuamin ka duhthusam a ni. He hmuna cham rih hi ka duh a, mahse thu tawp siam tur chuan hmanhmawh tut tut a ṭul kher lo," tiin a sawi.

Kar hmasa khan Lon­don club lian Arsenal hi Singapore-ah 2015 Premier League Asia Trophy khelin an zin chhuak a, final-ah 3-1 a Everton hnehnin an champion. Final-ah hian Walcott hian goal hma­hruai a khung nghe nghe.

Inhliam vangin tun hnai season hnih chung Wal­cott hi Premier Lea­gue-ah a inlan tam lo hle a, vawi 27 chiah a inlan. Season hmasa khan match 14 khel­in goal nga a khung.