Lacazette-a'n Lyon chhuahsan a tum lo

Season hman zawh taka Ligue 1 top scorer Alexandre Lacazette chuan a club khelh mekna Lyon chhuahsan tumna a neih loh thu a sawi.

Ligue 1 striker zinga sawi hlawh ber pawl hi season hman zawh taka a chet ṭhat em avang hian French club lian Paris Saint-Germain leh Premier League club-te nen sawizawm mek a ni a, amah duhtu zingah Arsenal leh Liverpool an langsar hle.

Mahse, friendly match-a Milan 2-1 a an hnehna tura goal khungtu Lacazette chuan, "Thuthang lengvel hi chu engmah lo mai a ni. Mi zawng zawng hnena lantir ka duh chu ka rilru hian hmun dang a hawi lo tih hi a ni. Lyon-a kan coach leh president hnenah pawh he hmuna cham chhunzawm zel ka duhthu hi ka sawi a ni," a ti.

2014-15 season-a goal 27 khungtu striker chuan,"Fan-ten min ṭan dan leh min ngainat dan hi ropui ka ti a, an tana khelh zel hi ka duh a ni. Min thlawp tlattu leh ka chunga rinna nghattu te ka chhanlet theih dan tur chu season ṭha tak hman a ni. Ṭha taka khelha sum leh pai hi ka buaina a ni lo tih mipuite hi hmuh tir ka duh a, chu chu football diktak pawh a ni," tiin sum tamna ringawt a um loh thu a sawi.