Japan-in stadium thar duang dawn

Kum 2020 khian Japan khawpui Tokyo chuan Olympic leh Paralympic a thleng dawn a, he a kutpui thlen tur atan hian khawvel hmun danga la awm ngai lo stadium dangdai tak chhawp chhuah a tum a; mahse he a thil tum hi an ti hlawhtling thei dawn lo.

Japan hian stadium chung khuh nei tur chu British architect Zaha Hadid an design tir a, an ruahman ang chuan pound tluklehdingawn 1.3 vel sen a ngai ang. He an thil ruahman hautak tak mai hi sawiseltu leh duh lo tu an tam em avangin stadium thar an duang leh rih dawn a ni.

Japan Prime Minister Shinzo Abe chuan, "Tunah chuan engmah lo aṭangin bul kan ṭan leh a ngai. Mahse kutpui kan thlen hunah chuan stadium hi kan peih hman ngei ang," tiin a sawi.

Abe chuan, "National Stadium hi mitin ta tur a ni a, chhuan lo awm leh zel tur ten an rochhun tur a nih bawk avangin kan lungawi tlanna ngeia sak kan duh. Kan ruahmanna thar hian kan kutpui thlen tur a ti buai lo turah kan ngai a, kan ṭanrual phawt chuan ṭha takin kan thleng thei ang," tiin a sawi bawk.

Kum 2019 Rugby World Cup chu Japan hian an thleng dawn bawk a, an ruahmanna hmasa ang kha chuan stadium thar hmang hman tura beisei an ni. Mahse tuna an ruahmanna tharah chuan an hman ve hman dawn loh avangin World Rugby chu an lungawi lo hle thung.

Japanese thuneitute chuan, "Tunah chuan Zaha Hadid nena kan ruahmanna chu tihtawp a ni ta. Tha ruk chhungin rua­hmanna kan nei fel leh vek hman ang. A bul kan ṭan leh dawna mah se kan tlai lo ang," tiin kum 2020 hmaa inpeih hman an la tum hle.

Kum 64-a upa British Dame Zaha Hadid hi a theu­neu lo hle a, archi­tectural awards chi hrang hrang dawng tawhin kum 2004 khan Pritzker Architecture Prize bakah kum 2010 leh 2011 Stirling Prizes a lo dawng tawh. Kum 2012 London Olympic stadium London Aquatics Centre pawh kha ama design hi a ni nghe nghe a ni.