Chelsea chungah Everton boss Martinez a lawm lo

Everton manager Roberto Martinez chuan Premier League champion Chelsea-in an rawlthar defender John Stones lakluh an tum thu mipui hriata an puangzar chuan a tih lawm loh thu a sawi.

Blues boss Jose Mourinho chuan kum 21-a upa England international lakluh an tum thu hi lo sawi tawhin, "Stones hi lakluh tuma kan dawr chhan chu kan player duhzawng a nih vang a ni," tiin media hmaah a puangzar.

Chelsea hian tun thla tir lam khan Stones hi lakluh ngei tumin pound maktaduai 20 nen Everton an lo dawr tawh a, mahse heti zata tam Blues-in sum an keng chung hian Toffees (Everton hming lem) lamin an hnar.

Spanish manager Martinez chuan, "Chelsea-in mipui hriata an hmalakna an puangzar mai hian minti lawm lo takzet a ni. Kei chuan Stones hi kan hralh ka ring lo a, Chelsea hi inbiakna neihpui kan tum lo. John Stones hi Everton player a ni a, a bak a awm lo. Mahni player te zuar chhawng ṭhin club kan ni lo a, club ṭhenkhatin media hmaa an thusawi mai mai vanga chi ai chi kan ni lo bawk," tiin Stones hralh tumna an neih loh thu a sawi.

Season hman zawh taka Everton tana league match 23 kheltu Stones hian Goodison Park-ah hian kum li cham turin contract a la nei a ni.

Mourinho erawh a dinna ngaiah a la ding reng a, Martinez-a ṭawngkam vang maiin 'The Special One' inti ngat hi a zam lo.

Portuguese manager chuan, "Transfer a inhawn rualin eng club leh player pawh transfer khawih turin an inring ṭhin a ni. Club ṭhenkhatin kan player lei duhin min dawr a, keini pawn mi player lakluh duhin club dang kan dawr ṭhin. Thil hote leh awlsam tak a ni. Roberto Martinez hnena ka sawi duh chu ka tih ang hian ti ve mai rawh se. Ka player kawl lai hralh ka duh loh chuan 'ka hralh duh lo' ka ti mai. Awlsam taka thil chinfel theih a ni," tiin Everton manager chu a harsa zawnga thil lakawiah a puh.