Real president-in mihang a ngaina lo - Casillas agent

Spanish keeper Iker Casillas-a agent San­tos Marquez chuan Real Madrid president Floren­tino Perez-a'n mihang player a ngainat loh thu sawi a, Claude Makelele leh Samuel Eto'o te chhuah chhan kha mihang an nih vang niin a sawi.

Perez-a'n kum 2003 khan khawvel bara­khaihin French midfielder Makelele chu Chelsea-ah a chhuahtir a, Eto'o erawh Real tana match thum lek a khelh hnuah Mallorca a zawm a, Barcelona-ah a thiamzia a nemnghet.

Santos chuan, "Ma­kelele chhuah chhan kha chu an zah tawk loh vang a ni. Florentino hian mihang chu a hmusit lo a, mahse a ngaina lo a ni. Eto'o chungchangah pawh khan kan ngaihdan a in ang lo a, Figo ang zetin thiam mah se a vun rawng vanga chhuah tir a ni," tiin a sawi.

Casillas-a agent chuan Real president Perez-a'n duhsak bik a nei tih a sawi a, Gareth Bale leh Karim Benzema te tlaktlum thu a sawi tel bawk.

Santos Marquez chuan, "Team pumpui leh coach-in Perez-a duhsak zawng chu an hria. Coach chhuak ta Ancelotti nena an inhmuh thiam lohna chhan pawh Bale vang a ni. Perez hian Bale hi khawvela player ṭha berah a ngai. Ballon d’Or winner (Cristiano Ronaldo) enkawl dan a thiam lo a, chuvangin Bale hi a duhna apiangah a awm," tiin a sawi.

Real chhungkaw chan­chin sawi zelin Santos chuan, "A duhsak leh chu Karim Benzema a ni. (Gonzalo) Higuain, (Angel) Di Maria, (Vicente) Del Bosque te kha an ṭha reng a, president ngainat zawng an nih loh vangin an chhuak. Del Bosque khan lawmman dawn theih zawng zawng a dawng a, mahse a hmel­­ṭha tawk lo a ni. Florentino khan tlema hmelṭha deuh (Carlos Queiroz) kha a la lut a, team a ti chhe vek ṭep a ni," tiin a ṭawng huai hle.