Season thar atan kan inpeih hman ang - Mihajlovic

Italian club hlun AC Milan coach Sinisa Mihajlovic chuan a club enkawl thar chu season thar ṭan hma ngeia an inpeih hman tur thu a sawi.

Inrinni khan season thar inpuahchah nan Milan hian France club ṭha Lyon an inkhelh pui a; 2-1 in an tlawm. Season hmasa Serie A table-a 10-na dinhmun hauhtu Milan hian season tharah hmasawn an tum hle a, an manager Filippo Inzaghi banin Mihajlovic an lak luh bakah Carlos Bacca leh Luiz Adriano an la lut tawh bawk.

Kum 46-a upa Serbian ma­nager chuan, "Chak loh result kan neih hian ka lawm ngai lo, mahse kan khelh danah erawh lawmna tur ka hmu thung. In­buatsaihna hun kan la ngah avangin kan hnual tur a ni lo," a ti.

Sawi chhunzawmin Mihajlovic chuan, "Kan in­khelh dan kan thlak avangin kan la bel tawk lo a, mahse player ṭha rual awm khawm kan nih avangin rei loteah kan bel thuai ang. Carlos Bacca, Luiz Adriano, Jeremy Menez leh Cristian Zapata te hi danglamna thlen thei khawpa thiam an nih avangin kan hma hun a eng hle," tiin a player lakluh tharte a rin tawk thu a sawi.