Van Persie-a'n United a chhuahsan chhan sawi

Robin van Persie chuan Manchester United manager Louis van Gaal-a'n a inhliam hnuah starting eleven chang leh tura chance ṭha a pek loh thu a sawi chhuak a. Dutch manager Van Gaal nena an inkar ṭhat tawk loh chu United a chhuahsan chhan niin a sawi.

April thlaa Chelsea leh United inkhelh khan Van Persie chu bench-ah ṭhuttir a ni a, hman a ni lo.

Persie chuan, "Khami ṭum kha thil kal dik lo a awm tih ka hriatna hmasa ber a ni. Reserve tana khel tura tih ka ni a, ka khelh zawhah bench-ah ṭhuttir ka ni. Louis nena kan inkar a danglam tih club chunga awm chuan an hre thei a, mahse professional ka ni a, chhuah tumna ka nei lo. Ka nupui Bouchra a hlim a, ka fate an hlim a, Manchester kha nuam ka ti," tiin buaina awm chhoh dan a sawi.

United manager Louis van Gaal chuan golf an khelhnaah a chhuah tur thu a hrilh thu sawi. Khami chungchang kha sawiin Persie chuan, "Netherlands-a enkawl tirh khan striker pa­thumna ka ni tih min hrilh a, theihtawp ka chhuah a, number one striker bakah captain ka ni. United lamah erawh ka position chuh letna hun min pe lo. World Cup kha a harsat avangin chawlh tam zawk kha ka mamawh a ni thei a, Krismas hunlai khan ni ruk chhungin match thum ka khel a, team tan na chungin ka khel a, ka insiamṭha thei ta lo a ni," tiin season hman zawh tak chu harsa a tih thu a sawi.

Arsenal captain hlui chuan, "Player puitling ka ni a, ka mawl lo a, ka thinrim hek lo. Football-ah chuan ka tawn ang hi a thleng thei tih ka hre sa a, chuvangin ka tana ṭha ber tura thutlukna ka siam a ṭul a ni," tiin United chhuahsan chu a career atana ṭha ber a nih thu a sawi.

Arsenal a chhuahsan chung­changa zawhna chhangin Persie chuan, "Hun hian hreawm ka tihnate a la kiang ṭhin. Arsenal captain ka nih laia United ka zawm avangin ka chunga lungawi lo an awm chuan ka hrethiampui e. Premier League champion duh vangin United ka zawm a, kan champion a ni. Chutihrualin Arsenal-a ka huntawng kha chu ka theihngilh tawh lo a, ṭhenkhat chuan ka record kha nuai reh an duh anga, mahse thil thleng tawh chu a awm reng a ngai a ni. Arsenal tan vawi 300 tling lo hretah goal 132 ka khung a, kum khat captain ka ni bawk. Football-ah chuan Arsene Wenger hi ka pa a ni a, footballer ṭhaa min chhertu a ni," tiin a sawi.