FIFA president chuh turin Platini an ngen
Europe a football thuneitu sang ber UEFA president Michel Platini chu khawvela football hruaitu tam zawk ten FIFA president thar turin an duh a, inthlan awm leh hmasa berah chuh ve turin an ngen nia sawi a ni.
French footballer ropui tak ni ṭhin hi ama kaihhruai mek UEFA bakah Asia, South America, North, Central America and Caribbean khawmualpuia football hruaitu ten FIFA president hi chuh ve turin an ngen a, thutlukna erawh Platini hian a la siam lo thung.
FIFA president ṭanglai Sepp Blatter chuan June 2 khan a hna chelh lai a chawlhsan tur thu a puang a, a vawi nga nana FIFA president atana thlan a nih hnu ni lina leka Blatter-a'n a ban thu a puan chhan hi eiruk thubuai vanga FIFA hmingchhiat vang a ni.
Blatter thlaktu tur thlanna neih hun hi nimin khan FIFA executive committee chuan an ngaihtuah a, a hun atan February 26, 2016 chu ruat niin October 26 thleng presidential candidate tur tan hming thehluh theih a ni ang.
Hetihlai hian May thlaa FIFA president inthlanna a Blatter hneh lotu Prince Ali bin al-Hussein chuan Swiss pachal Blatter chu FIFA president office luah reng lo tura hrilhin a hna chelh lai chu chhuahsan nghal turin a ti.
Prince Ali chuan, "President Blatter hian a hna hi a chelh chhunzawm reng tur a ni lo a, a office hi a chhuahsan a hun tawh takzet a ni. Amah thlaktu tur thlanna kan nei thuai dawn a, inthlanna thianghlim leh langtlang zawk nei tur chuan hruaitu lailawk kan neih a ngai. Inthlak danglam kan sawi ṭhin hi thlen tir kan duh takzet a nih chuan tun aṭanga bul kan ṭan a ngai a ni," tiin FIFA thlak danglam tur chuan tun aṭanga bul ṭan a ṭul thu a sawi.