Sterling-a'n City a ringtawk

Liverpool aṭanga Manchester City zawmtu Raheem Sterling chuan season tharah a club thar chuan Premier League leh Champions League-ah ro an rel theih a rin thu a sawi.

Vawiina International Champions Cup-a AS Roma nen an inkhelh huna City tana a match hmasa ber khel tur Sterling chuan ,"Manchester City ka zawm chhan pakhat chu hma an sawn nasa em em mai hi a ni a, vawiina an dinhmun thleng tur hian an bei nasa em em a ni. Tunah pawh hian hmasawn zawngin ke an pen zel tih a hmuh theih a, England leh Europe-a rorel tur khawpin an ṭha tawk a ni," tiin a club thar chu a fak hle.

Kum 20-a upa English winger chuan Champions League khel tura a phur thu sawiin, "Champions League-a khelh hi chu engtiklai pawhin a nuam reng a ni. Kum naupang tak hmasawn mek ka ni a, competition sang taka player ṭha tak tak te nena in el leh inkhelh ho hi keini kum ang zatah chuan a nuam bik em em a, kan theihna tak tak pho­lang turin min pui ṭhin a ni," a ti.

Pound maktaduai 49-a City zawmtu chuan a club thar fak lehin, "He team hian player ropui tak tak a nei a, squad khata player ṭha tak tak Sergio Aguero, David Silva leh Yaya Toure te nena awm ho chuan kan hmabak chu hmasawn a ni," tiin hmasawn theih a inbeisei hle.