Sports Minister thlawpna hmutu Vijender
Indian boxer zinga professional huang chhung luhchilh hmasa ber Vijender Singh chuan amah an sawiselnate chu engmah lo maia ngai turin sports minister Sarbananda Sonowal-a'n a fuih thu a sawi.
Vijender hian tun thla tir khan amateur boxing chhuahsain professional huang chhunga khel turin Queensberry Promotions hnuaiah kum li daih contract a ziak a, Queensberry hian a inhnekna tur vel an buaipui sak ṭhin dawn a ni.
Kum 29-a upa boxer chuan, "Sports minister nena kan inkawmnaah hian Olympic Games vawi thumah India tan ka inlan tawh thu leh professional huang chhung ka luhchilh a hun ve tawh thu ka hrilh a, ka thutlukna hi min ṭawmpuiin duhsakna min hlan a ni," a ti.
Indian mipa boxer zinga Olympic leh World Championship bronze-medalist hmasa ber hi nakkum maia Rio Olympic khelh tur a nih tawh laia India ai a awh thei lo tur hian sawisel a hlawh hle a, hetiang sawiselna karah hian sports minister thlawpna a hmuh ṭhat thu a sawi chhuak ta a ni.