Turan a chhuak lo ang - Enrique
Barcelona manager Luis Enrique chuan a player thar Arda Turan chu loan-a an chhuahtir loh tur thu a sawi.
La Liga champion Barca hian pound maktaduai 34 sengin Atletico Madrid aṭangin kum nga chhung cham turin Turan hi Nou Camp-ah an la lut. Amaherawhchu FIFA-in Catalan club hi player naupang lakluh dan dik loh avangin hrem mek an ni a, kumin chhungin player an la ziak lut thei lo. Turkish midfielder Turan hian January thla aṭangin a khel thei chauh ang.
Hetiang a nih avang hian an fitness ṭhat zawk nan Barca hian an player thar Turan leh Aleix Vidal te chu loan-a chhuahtir an tum niin thuthang a awm a, mahse Enrique chuan a player tharte hi chhuahtir a tum lo thung.
Season hmasaa Barca treble champion puitu manager Enrique chuan, "January thla thleng an inkhel thei dawn lo tih hre lawk chungin kan la lut a, chuvangin loan-a chhuahtir leh hi a ṭul ber lo," tiin a sawi.
Barca thiampuipa Lionel Messi-a'n pre season camp a la zawm loh chungchang sawi chhunzawmin Enrique chuan, "Leo hi tuna kan hnena a la awm loh chhan chu chawlh a mamawh vang a ni. Copa America final-ah an ram hruai thlengin inkhel hautak tak a hmachhawn a, chawlh a mamawh rih. Inkhelh duh reng mi ni mah se a taksa tan chawlh a ṭul a ni," tiin a player duhlai chanchin a sawi bawk.
Season thar inbuatsaih nan Barcelona hian United States-ah pre season tour an nei mek. Nilaini zing dar 8:30 khian Liverpool legend Steven Gerrard-a club thar LA Galaxy an hmachhawn dawn a, Star Sports 2-ah a entheih ang.