Zimbabwe laka chak lo India

Pathianni khan Zim­babwe leh India chuan Twenty20 cricket an khel a, run 10-in Zimbabwe an chak.

Mual neitu Zimbabwe hi bat hmasa zawkah an ṭang a, over 20-ah run 145 vaw chhuakin mi pasarih an hloh. Africa cricket team tan hian Chamu Chibhabha a che ṭha a, kum 28-a upa batsman hian ball 51 a hmachhawnah run 67 vaw chhuakin dinhmun duhawm takah Zimbabwe a hlangkai.

India bat hun a thleng a, ball 25 a hmachhawna run 42 vaw chhuaktu Robin Uthappa che ṭha thawkhat viau mah se Indian batsman dang an che hleithei lo a, India an tlawm. India hian over 20-ah run 135 vaw chhuakin mi pakua an hloh a ni.

Captain MS Dhoni leh Virat Kohli bakah player langsar engemawzat tello a zin chhuak India team hi an che chhe hran lo. Zimbabwe nena ODI series match thum an khelhah hnehna chang fai vekin 3-0 in series an la a, tun tour bik atana captain Ajinkya Rahane hnuaiah an che ṭha hle.

Twenty20 match hi vawi hnih khelin an match hmasa zawkah India hi run 54-in an lo chak tawh a ni.