Liverpool tlarhmain Rodgers a ti phur

English club lian Liverpool manager Brendan Rodgers chuan an tlarhmain a tih lawm thu sawiin, tun nipui transfer-a an tlarhma player lakluhte chuan ropuina ramah Liverpool an hruai leh theih a rin thu a sawi.

Liverpool hian tun nipui transfer-ah Hoffenheim aṭangin Brazilian forward Roberto Firmino leh Burnley aṭangin striker Danny Ings te an la lut tawh a, nipui transfer-in hawn tirh aṭanga lakluh an tum tawh Aston Villa striker Christian Benteke chu a release clause pound maktaduai 32.5 a lei an ngam avangin Anfield-a medical nei turin a inbuatsaih mek bawk.

Rodgers chuan season hnih liamtaa an goal khung ang zat an khung leh theih a beisei thu sawiin, "Premier League-a pahnihna kan nih ṭum khan goal 101 tehmeuh mai kan khung a, nikumah erawh goal kan khung tam tawk lo. Tunah chuan team thar kan in din tawh a, kan ngaihtuahna leh he club thil tumte chu la ngai reng mah se player thar kan lakluh avangin kan danglam dawn a ni. Kan player lak tharte hi goal thun nuam ti mi leh goal hmaa hlauhawm tak ṭhinte an ni a, hei hian min ti phur em em a ni," tiin season thar a nghakhlel hle.

Kum 42-a upa Irish manager chuan Firmino hming sawi langin, "Kum naupangte nichungin European football-ah tawnhriat a ngah em em a, Brazil squad-a an player pawimawh ber pawl a ni chho der tawh a ni," a ti.

Steven Gerrard-a'n a chhuahsan vanga captain thar hnuaia khel tur Liverpool hian an captain thar atan kum 25-a upa Jordan Henderson an ruat thar.

Rodgers chuan a captain thar chungchang hi sawiin, "Jordan hian he club tana player ropui tak leh hun rei tak chhung captain lo ni tawh hnen aṭangin mawhphurhna ropui tak a la chhawng a ni. A player puite paw'n captain atana Jordan ruat a ni hi an pawm thlap a, hruaitu ang tak takin an en der tawh a ni," tiin Henderson chuan team kaihhruai kawngah hma a sawn chak hle thu a sawi.

Swansea boss hlui chuan English midfielder hi fak chhunzawmin, "Mi ṭhenkhat chu mawhphurhna thar pek an nihin an zo lo ṭhin a, an tlukchhiat phah ṭhin. Jordan hian kum naupangte nichungin a mawhphurhna te a la thiam em em. A qaulity avangin squad chhungah zah a hlawh a, a player pui te entawn a ni," a ti.