Formula 1 season an ṭan dawn ta

Pathianni chawhma dar 9:30 hian Melbourne Grand Prix Circuit-ah Formula 1 Australian Grand Prix an tlan dawn a, tun season atana intlansiak hmasa ber a ni ang.

F1 champion lai Max Verstappen chu mipui ngaihven a ni dawn a, hetih rual hian Mercedes aṭanga Ferrari zawmtu Lewis Hamilton chu danglamna siam thei tur leh boruak nei lian tura ngaih a ni bawk.

World champion vawi sarih ni tawh Hamilton chuan, "Ferrari ka zawm hian thil fiah tur hran ka nei tawh chuang lo a, tun hma lama mi ten ka theihna hrang hrang mi fiah an tum ang kha a ni tawh lo.

"Car intlansiakna sang berah hian hun rei tak chhung ka lo awm tawh a, chuvangin tawnhriat ka ngah tawh. Ferrari hi team hlun leh ṭha a ni a, beiseina pawh ka nei sang. A pawimawh ber chu team tan a ṭha thei anga bera beih a ni," tiin a sawi.

Britain tlangval Hamilton hi Charles Leclerc nen an tlan dun dawn a, driver pahnih hi chungnung taka awm duh mi ve ve an nih avangin Ferrari tan pawh enkawl thiam an ngai hle ang tih a chiang.

Kum 40 mi Hamilton chuan, "Ka teammate thar hi Mr Ferrari tia sawi theih a ni a, team tana a inpekna leh a puitlinna te hi hriat a nuamin a hlu bawk, hna thawhpui nuam tak tur a ni tih pawh ka chiang," tiin a sawi.

Leclerc hian kum 2019 khan Ferrari hi a zawm a, tun hmain Sebastian Vettel leh Carlos Sainz te chu Ferrari car a lo khalh pui tawh a, tunah tawnhriat ngah Hamilton nen an thawkdun leh dawn a, chanchin ngaihnawm an nei ang.

Kum 27 mi Leclerc chuan, "Lewis hi kan infiamna huangah chuan mi bik a ni a, legend ni chungin kan hnenah a lo kal. A nihna takah chuan kei aiin min ten an ngaihven zawk tih ka hria a, hei chu thil mak pawh a ni hran lo.

"Hun rei vak lo kan hman dun tawhah pawh a lak aṭangin thil tam tak ka zir chhuak a, team ka zawmna rei tawh zawk mah se ka hnen aṭangin thurawn a mamawh lo, a chhan chu F1 huangah tawnhriat a ngah tawk a ni," tiin a sawi.

Hamilton hian F1 title pasarih a nei tawh a, champion tam lamah Michael Schumacher nen record inṭawm an chelh mek - German legend Schumacher hi kalsan a tum dawn, a teammate thar Leclerc erawh la champion ngai lo a ni thung.

Khawvela car intlansiakna sang ber hi tun season chhungin inelna vawi 24 neih tura tih a ni a, a hnuhnung ber chu December thla tirah Yas Marina Circuit, Abu Dhabi-ah Abu Dhabi Grand Prix tlan a ni ang.