Zarkawt tan Khatla ral a lian

Mizoram Super League champion lai Zarkawt BCA an tlawm leh tawh - Ningani zan khan Zarkawt hian an hmelma kumhlun Khatla TBL an hmachhawn a, 85-80 in an tlawm a, Sharda University Mizoram Super League X-a match hnih an khelha vawi hnih an tlawmna a ni der tawh!

Zarkawt BCA hian Khatla lakah an bul ṭan ṭhat loh an tuar tiin a sawi theih a, quarter lina chu 26-15 ngawtin rawn la thei mah se, quarter hmasa pathumah 17-27, 22-26 leh 15-17 in a hnufual zawk vek an ni a, an 'comeback' zo ta ngang lo a ni.

BCA tan Marquis Cunningham (19 points), Justin Gnanaraj (15), Lalnunpuia Renthlei (13) leh Lalrina Renthlei (12) te che ṭha pangngai viau mah se, Khatla TBL tan Nary James bawk a langsar.

MSL-a a match hmasa bera point 21 nei nghal, Ohio tlangval hian point 30 ngawt a team tan a hlawh chhuak - point 27 neitu Vanlalṭhazuala pawh sawi bo theih a ni lo a, Khatla TBL-in match hnih a zawnin hnehna an chang ta.

MSL vawi nga champion tawh BCA hi vawiin tlai dar 5:30-ah an inlan lehnghal dawn a, kai thar Saron BC an hmachhawn ang - player ṭha rual awmna BCA tan a zawna vawi thum tlawm a chi loh a, champion beiseina hma taka mangṭhana ang hialah a chhal theih ang.

Chutihrual chuan Saron hi kai thar chauh ni mah se, MSL-ah an tlangnel nghal viau a, an match hmasa berah Saron par vultir nghalin, Electric BC an hneh - Zarkawt BCA hneh turin an inringtawk hle ang tih a chiang.

Zarkawt BCA an insiamṭhat theih loh laiin, Champhai BC erawh an match hmasa bera Zemabawk BC an ngam loh hnuin an insiamṭha nghal a, kai thar Electric BC chu 98-72 in an hneh. Champhai tan Lalropuia'n innghahna tlak a ni tih pholangin point 29 ngawt a thawk chhuak a, India international Harshwardhan Tomar (19) leh Dee Franklin (18) te an che thei viau bawk.

Electric tan Lalhlunmawia (18) leh Zonunsanga (17) te khel ṭha viau mah se, an team an chakpui zo chuang lo a, MSL kaithar Electric-in Mizorama basketball inelna sang ber hautakzia an tem zel - match hnih an khelh tawhah an la tlawm ve ve.

Zanin dar 8:30-ah Electric hi an inlan lehnghal dawn a, Chanmari BC an hmachhawn dawn. Chanmari club hi kai thar ve tho ni mah se, an match hmasa bera Zarkawt BCA hnehtu an ni a, Electric tan R. Dengṭhuama Hall-ah êng chhit a awlsam dawn lo.