La Liga nomawi inum boruak a sang
Premier League, Bundesliga leh Ligue 1 lamah champion a chiang titih a, La Liga erawh a la ngaihnawm dawn chauh - champion beisei Barcelona, Real Madrid leh Atletico Madrid an la awm.
Hmahruaitu Barcelona leh Atletico inthlauhna hi point khat chauh a ni a, hei hian nomawi inchuh boruak a la sosanzia a pholang chiang hle. Pathianni zan dar 1:30-ah Atletico hian Barcelona an mikhual dawn.
Vawi khat chetsualin La Liga table-a top three a la her danglam hlawk hlawk thei dawn tihna a ni a, vawi khat chetsual a pawi dawn tihna a ni - Pathianni zan inkhel hi 'final' tia kan sawi a nih pawhin a awm lo hran lo.
Thawnthu inang lo
Champions League round of 16 lamah Barcelona-in Benfica hnehin quarterfinal an lut a, Atletico Madrid erawhin Real Madrid an ngam lo a, an tla - Atletico chak loh dan hi a na lehzual.
Diego Simeone naute hi penalty-ah an chak lo a, Julian Alvarez-a chhuih luh chu VAR hmanga ennawn a nih hnuah pawm a ni lo. Simeone-a rilru a dam thei lo a, inkhelh zawhah na takin referee thutlukna a sawisel.
Atletico tana phuba lak dan ṭha ber chu La Liga nomawi chawi a, Real chhuk en a ni - chumi tur chuan an elpui zinga mi Barca an hneh phawt a pawimawh a, Pathianni zanah an chak a nih chuan champion beiseina a sang lehzual ang.
Cho leh cho
Atletico-in tun season-ah Barcelona hi vawi hnih an hmachhawn tawh a, tlawm an la nei lo. An intawn hmasakna hi La Liga niin, 2-1 in an chak a, chakna goal hi hun pek belh minute ruknaa Alexander Sørloth-a khung a ni.
Copa del Rey semifinal-ah team pahnih hi an intawng leh a, first leg-ah 4-4 in an inhnehtawk. Atletico hian 2-0 a hma an hruai hnuah, Barca-in goal liin an chhanglet a, 4-2 in dinhmun duhawm takah an ding hman.
Mahse, Atletico hian si phurh an sut zo leh a, hun pek belh minute thumnaah Sorloth bawkin an goal lina a khung. Diego Simeone nauten Barca hmaah tlawm an tum lo tih a chiang a, zaninah pawh point thum an beisei dawn.
A hmuhnawm ang
Tun season-a team pahnih inhmachhawn tawh vawi hnih lekah goal 11 ngawt a lut tihna a ni a, Catalan club enkawltu Hansi Flick hian a high pressing game hi a thlak a rinawm loh avangin Pathianni zanah pawh a hmuhnawm leh dawn chiang.
Barca-in player inhliam tharlam an nei lo a, Raphinha, Lamine Yamal leh Robert Lewandowski ten season duhawm tak an hmang mek - Atletico lakah goal khung an châk vek dawn.
Atletico hian Julian Alvarez leh Antoine Griezmann an nei tih theihnghilhsak loh a ṭha a, Madrid khaw club hian UCL ber an thlah takah chuan La Liga nomawi chawi tumin an thawkrim lehzual ang - Pathianni zan chu meng rei leh phawt mai ang!