Bundesliga entu awm leh dawn lo

German Football League (DFL) chuan an rama football inelna sang ber Bundesliga chu a hmuna entu awm loin khelh a ni leh dawn tih an sawi, stadium chhungah fans lut hman leh tawh mah se tunah chuan khap leh rih a ni dawn.

Season hmasa chawhnu lam aṭang khan coronavirus vangin infiamna khawvel a buai a, Bundesliga pawh a hmuna entu awm loin an khel. Season tharah erawh stadium khat lo mah se fans eng emaw zat chu a hmuna an luh phalsak an ni hman.

Mahse, tun hnaiah German ramah hri kai thar an pung leh nasa a, ram chhunga ri vei 14,964 chauh awm kha mi 464,239 zetah a kaisang leh tawh. Kumin chhungin stadium chhungah fans an lut leh thei tawh rih lo mai thei.

Nilaini zan khan German chancellor Angela Merkel chuan November 2 aṭangin, ram chhunga infimana lian tham reng reng chu a hmuna entu awm loin kalpui a nih tur thu a sawi a, league thuneitu sang lam pawhin an zawm nghal a ngai.

DFL chuan thuchhuah siamin, "Bundesliga bakah a hnuai lama divison awmte chuan inkaihhruaina dan fel takin kan zawm a, hei vang hian him takin a hmunah ngei fans pawh an lut thei hman.

"Mahse tunah chuan stadium chhunga mipui luh khap a ni leh ta hi pawi kan ti takzet, keini lam chuan player leh mipui hriselna dinhmun hi kan ngai pawimawh hle a ni," tiin a sawi.

Bundesliga season kal laiah hian match nga an khelh aṭanga point 13 hmutu RB Leipzig chuan hma an hruai mek, champion lai Bayern Munich chu pahnihnaah awmin point 12 an nei thung.