Quarterfinal-ah Djokovic a lut

Vienna Open-ah Novak Djokovic chuan Borna Coric chu 7-6 (13-11), 6-3 a hnehin quarterfinal a lut a, world number 1 ni chunga season khar turin a hna thawh theih chin a thawk - a dinhmun a ṭha ta hle.

World number 1 Novak dinhmun khum tur chuan a hnuaia awm Rafael Nadal tan a harsa tawh, Spanish tlangval world number 2 hian wildcard hmuin thla leh a khelh tur Sofia Open-ah a hlawhtling a nih chuan number 1 nih theih dan a la nei.

Amaherawhchu, Serbian star hian Vienna Open nomawi hi a chawi a nih erawh chuan number 1 ni chungin season a khar dawn chiang a, record nei ṭha Pete Sampras nih rualin a chung bera awm chungin kum tawp vawi ruk a hmanna a ni ang.

Grand Slam vawi 17 champion tawh hian a match lehpekah chuan, Lorenzo Sonego leh Herbert Hurcakz te inkhela chak zawk a hma-chhawn leh ang.

Djokovic tan Vienna Open nomawi hi awlsam taka lak ngawt theih a ni dawn lo. Coric hneh tur pawhin vanneihna a mamawh tel a, set hmasa zawkah set point vawi li a inchhanhim a, set hnu-hnung zawkah erawh a tir lamah a khingpui service chhuhsakin a tlang.

Season duhawm hmangtu Djokovic chuan, "Boran kha a ṭang rei thei hle a, min beih let nat em avangin hmachhawn a hautak takzet. Hun rei tak aṭang tawha ka ṭhian ṭha kha niin, tennis court chhungah erawh kan inel ṭhin thung a ni," a ti.

Austria khawpuia khelh Vienna Open-ah hian mipa ranking sang zual 10 zinga paruk ngawt an inlan. Tualchhung tlangval Dominic Thiem pawhin last 16 a inhlangkai tawh, US Open champion hi seeded pahnihna niin final hma chuan Djokovic nen an inhmachhawn lo ang.