Lampard enkawl Chelsea an mawi ta

Frank Lampard-a'n Chelsea a enkawl dawn tih an hriat khan fans an phur a, attacking game hmuhnawm khel chhuak chunga hnehna chan pawp pawp kha fans lam beisei a ni - an duh leh beisei ang chu FK Krasnodar lakah an lantir.

Nilaini zan Champions League group E inkhelah Chelsea hian FK Krasnodar chu 4-0 in an sawp a, point li hmuin a chung berah an awm; an group inkhel dangah Sevilla chuan an mikhual Rennes chu 1-0 in an hneh ve bawk.

Blues tan hian Hakim Ziyech chuan a vawi khat nana inkhel bul ṭanin goal a khung nghal a; Callum Hudson-Odoi, Timo Werner leh Christian Pulisic ten goal khat ṭheuh an thawh bawk - Jorginho chuan penalty a hlah thung.

Chelsea hian an match hnuhnung pahnihah goal an khung lo a, player lei nana sum hmang hnem Lampard dinhmun chu derthawng hman nia sawi a ni. Russia ramah English manager hian pound maktaduai 160 zenga a lei khawm Ziyech, Werner leh Kai Havertz te tlarhma lamah a dah a, a duh ang goal an sual chhuak ta.

Russian club lamin an mahni aia club ṭha zawk an tum a ni tih an hria a, mahni inveng chunga an khelh avangin Blues lam tan goal khung nghal ngawt theih a ni bik lo. Jorginho-a'n penalty aṭangin keeper Matvey Safonov bum mah se goal ban a pet per.

Chawlhlawk hma hretin khel ṭha tak Hudson-Odoi-a'n goal a khung, minute 248 hnua Chelsea goal neih leh hmasak a ni! Second half-a an penalty hmuh pet turin Jorginho aiah Werner a rawn ding chhuak a, German forward hian a hlah lo.

Khelmuala hmuhnawm Ziyech-a'n minute 79-naah an goal thumna a khung a, goal a khung hmaa a inher vel chu hmuhnawm tak a ni. Substitute Pulisic chuan hun tawp hma chiahin chak nemnghehna a khung zui leh bawk.

Hnehna an chan avangin Chelsea fans lam an lawm a, an beisei leh duh ang inkhel an hmu. FK Krasnodar chak lo mah se Europe club ṭha Blues hmachhawn theih hi lawmna tham a tling. English club tan an hneh hi eng ang tak nge an nih tih chu chhut a ngai.

Russian club hi kum 2008 a din chauh kha a ni a, Chelsea erawhin Krasnodar din kumah Russia leilungah UCL final an lo khel daih tawh. Tuna manager Lampard hi Russia rama final khelh ṭumin player pawimawh a a ni a, kum 12 hnuah Europe inelna sang berah an inhmachhawn.

Manager Murad Musayev enkawl team hi an ṭhang duang a, Russian league-ah hian third division aṭanga bul ṭanin season thum chhung lekin division sang ber atan an inpet kai thei a, season hmasa khan pathumna niin UCL khel tur hian an tling.

Krasnodar Stadium-ah hian hri leng karah fans 11,000 chu a hmuna an luh phalsak an ni a, tarmawi hrang hrang nen an player-te inkhel hi an en, chak zo lo mah se an team naupan zia leh hmasawn zia ngaihtuah chuan an thlen chin hi lawmna tur a ni.

Chelsea manager Frank Lampard chuan, "Club thuneitu lam aṭangin thlawpna ka hmuh ṭha a, tun ṭuma kan inkhel hian a tih lawm ngei pawh ka beisei, goal li khung bakah kan lama a luh loh avangin ka lawm hle," a ti.

Kumin March thla hnua a vawi khat nan Chelsea hian fans hmaah match an khel a, a hmuna entu zingah hian Russian sumdawng hausa leh Blues neitu ni bawk Roman Abramovich pawh a tel.

English manager chuan sawi zawmin, "Ka naute an khel ṭha vek, a bik takin goal khung tute ka lawmpui. Tlarhma lama khel ni sia goal khung loh hi a hrehawm thei, goal an khung avangin inrintawkna an neih belh bawk ang," a ti.

Krasnodar coach Murad Musayev chuan, "Kan khel chhe lo, hun chanve hma lamah phei kha chuan goal khung theihna kan insiamsak nual. Mahse beisei loh lam aṭangin goal kan chhuah a, a hnu lam kha chu a harsa tawh a ni," tiin a sawi.

•    Chelsea hian khualmuala European football group stage an khelh hnuhnung pariatah chak loh an nei lo, vawi ruk chakin ṭum hnih chu an inhnehtawk. Vawi nga ngawt goal an chhuah lo.

•    2015 December thla hnua a vawi khat nan Chelsea hian Champions League bikah a zawnin match hnih chhung goal an chhuah ta lo a ni.

•    Kai Havertz khan European football-a a match hnuhnung pasrih aṭangin goal pasarihah a inrawlh, goal li khungin a ṭhiante khung tur vawi thum a siamsak thung.

•    Callum Hudson-Odoi khan Chelsea player zingah kum 20 tlin hma a Champions League goal khung thei pahnihna a ni a, season hmasa khan Reece James chuan Ajax lakah a lo khung tawh bawk.