A chung berah Mumbai Indians

Mumbai Indians-in Nilaini zan khan wicket ngain Royal Challengers Bangalore an hneh a, Indian Premier League match 12 khelh zawhah point 16 hmuin hmahruaitu an ni.

Sheikh Zayed Stadium-ah Mumbai Indians-in vawm hmasak an thlang a, Jasprit Bumrah a che ṭha leh pek hle. Indian bowler ṭha mi hian run 14 chauh pein wicket thum a la a, Bangalore-in run 164/6 chauh an siam theih phah. Royal Challengers tan hian Devdutt Padikkal (74) leh Josh Philippe (33) ten bul ṭan ṭha mah se thlawptu ṭha an nei lo a, captain Virat Kohli pawhin run kua chauh a siam.

Mumbai Indians bat hun a thleng a, Suryakumar Yadav-a'n thi loin run 79 a siam. Kum 30 mi Suryakumar hi Mumbai-a piang leh seilian a ni a, India senior team tan la inlan lo mah se theihna a neih sanzia erawh cricket tui pha chin chuan an hre vek ang. 2018 IPL auction-ah khan Mumbai Indians-in an player hlui hi nuai 320 in an la let a, ram tana la khel si loah chuan a man a to ber.

Suryakumar hi Bangalore nen hian man of the match-ah thlan a ni. Mumbai hian inkhel pawimawh taka hnehna an chan avangin qualifier 1 an khel lo a nih pawhin eliminator tal chu an khelh ngei a rinawm tawh.

Zanin dar 7:30 hian Kings XI Punjab leh Rajasthan Royals te an inkhel dawn. Punjab hian a zawna match nga hnehna an chan tawh avangin palinaah an awm a, playoff khelh an hnaih hret hret. 

Chutihrualin Rajasthan Royals hian point 10 an hmu tawh a, Punjab an hneh theih chuan an point hmuh zat a inang dawn. Royals tan playoff khel turin chak ngei a ngai a, Sheikh Zayed Stadium-a inkhel tur hi inkhel pawimawh bik a ni.

IPL-ah team pariat awmin vawi hnih ṭheuh an inkhel kual a, heta a sang pali hian playoff an khel dawn. League round zawha pakhatna leh pahnihna ten qualifier 1 an khel dawn a, heta chak hian final an lut nghal ang.

Pathumna leh palina ten eliminator round an khel a, heta chak hian qualifier 2-ah qualifier 1-a chak lo an hmachhawn ang. Qualifier 2-a chak hian final an lut dawn a, qualifier 1-a chak zawk nen nomawi an inchuh ang.