Italy-ah F1 entu awm dawn lo

Pathianni zan hian Italy rama Imola tlan kawngah Emilia Romagna Grand Prix neih a ni dawn a, a tirah chuan a hmuna entu awm theih beisei ni mah se sorkar thuneitu lamin an thutlukna siam tawh hi an sut.

Imola hian 1980 aṭanga khan kum 27 chhung chu a zawnin F1 inelna hi a lo thleng tawh, mahse tun hnaiah erawh rei tak an chawl tawh thung - kumin hian 2006 hnua a vawi khat nan inelna an nei leh dawn chiah.

Ruahmanna hmasaah chuan a hmunah hian entu 13,000 awm tura tih an ni. Pathiannia intlansiak bakah hian Inrinnia tlan chhinna an neih chu fans lamin en theih beisei a ni, mahse tun hnaiah coronavirus a hluar thar leh avangin entu awm a rem dawn ta lo.

F1 thuneitu lam chuan Italy sorkar thutlukna an pawm thu sawiin, "An dinhmun kan hriatthiam puiin an thutlukna kan zahsak hle bawk," an ti.

Italy hi motosports ngainatna ram a ni a, car bakah bike intlansiakna pawhin ngaihhlut a hlawh thei hle. F1 huangah hian Italian Grand Prix pawh a awm a, hei bakah hian hri leng vanga buaina karah inelna dang Emilia Romagna GP hi an neih belh dawn a ni.