AlphaTauri-ah Gasly a cham dawn

Tun season Formula 1 Italian Grand Prix a hnehna changtu Pierre Gasly chuan season tharah pawh AlphaTauri car a khalh chhunzawm zel dawn, inremna an neih thu hi Red Bull hnuaia awm F1 team hian an puang.

Kum 24 mi Gasly hi driver theihna nei sang tak a ni a, season tharah Red Bull team pangngai tan Dutch driver Max Verstappen nen an tlan dun dawn nia sawi awm mah se AlphaTauri car a khalh chhunzawm zawk dawn.

Gasly hian 2017 khan AlphaTauri hi a zawm, khatih lai chuan Toro Rosso tih an la ni. Season kal laiah hian point 63 hmu tawhin pakuana dinhmun a luah mek.

AlphaTauri team boss Franz Tost chuan, "Pierre hian theihna sang tak a nei a, midang el phak turin a tling tawk a ni tih chu a lantir tawh. A rilru a paukhauh a, season thara kan thawkho chhunzawm thei tur hi ka lawm hle," tiin a sawi.