England squad: Tute nge Tuchel-a'n a thlan?

Football khawvela ram langsar pawl ni reng England chuan an nghahhlelh an hre ta - coach thar Thomas Tuchel chuan Three Lions a enkawl hnua a squad hmasa ber a puang a, March 21 & 24 hian World Cup qualifier-ah Albania leh Latvia an mikhual ang.

Manchester United aṭanga loan-a Aston Villa pantu Marcus Rashford-a'n tun dinhmunah chuan a tifuh rih rem rem hle - Villa chuan Champions League quarterfinal hial hruai thlengin, ram tana inlan turin loh koh a ni ve leh ta.

Kum 34 mi Jordan Henderson-a'n ram tana koh a beisei tawh kher lo mai thei. Mahse, Liverpool captain hlui hi a hruaitu ṭha nihna ringawt pawh a hlu tih hriain, Thomas Tuchel-a'n a ko.

German coach hian a vawi khat nan Newcastle United defender Dan Burn leh Arsenal midfielder Myles Lewis-Skelly te a ko a, Burnley goalkeeper James Trafford leh Liverpool defender Jarell Quansah te pawhin ram tana an match hmasa ber khelh an beisei ang.

Kha le Rashford

March 2024 khan England-in Brazil chu friendly match-ah an hmachhawn a, khami hnu khan Three Lions tan Rashford a inlan leh tawh lo - Euro 2024-ah a tan hmun a awm lo zui a, Manchester United-in thlasik transfer-ah loan-in an chhuahtir zui.

Mahse, English forward hian Villa a pan hnuah ngai a awh leh mek a, goal la khung chiah lo mah se, match kua a khelhsak tawhah assist vawi li nei tawhin, a team thar tan hian a thawhhlawk hle.

Tuchel chuan, "Marcus hian kawng dik a zawh leh mek a, a ṭhat dan bera a khelh leh theih nana lo nawr kal hi kan tih tur niin kan hria," a ti a, kum 2020 khan Tuchel hian Paris St-Germain a enkawl laiin, Rashford hi, "Player hlauhawm tak a ni," tiin a lo sawi tawh.

Villa tana Rashford-a khelhpui Ollie Watkins-a'n tun season-ah goal 14 leh assist 12 nei tawh mah se, a khupah hliam a neih avangin koh a ni lo a, thla hnih zet hliam vanga a chawlh hnua khelmual lut leh tawh Tottenham striker Dominic Solanke chu kohkir a ni thung.

Hendo telna

Kum 2010 khan Fabio Capello hnuaiah Henderson-a'n England tana a match hmasa ber a khel a, November 2023 thleng kha chu ram tan a inlan zui - a reh vang vang a, Ajax-ah a khelh tawh avangin a inlan leh pawh a beiseiawm tawh lo.

Mahse, Tuchel chuan English midfielder hi a ko. Tuchel chuan, "Jordan hi hnehna chang ṭhin a ni a, Ajax captain a ni bawk. Hruaitu ṭha, nungchang ṭha tak, phur em em leh midang tiphur thiam a ni.

"A khelhpuite chu a ṭha thei ang bera khel turin a beisei ṭhin a, England-a kan hnathawhna tura kan beisei ang chu a nei vek. Kan fan-ten an chhuan em em tur team din kan duh a ni," a ti a, Hendo a koh chhan a sawi.

England tana match 81 khel tawh Hendo hian kum 2023 nipui lai khan Liverpool a chhuahsan a, Saudi Pro League club Al Ettifaq a zawm. Mahse, thla ruk chauh a khelh hnuah Ajax a zawm a, Dutch club tan captain niin, tun season-ah match 38 a khel tawh.

England squad

Goalkeepers: Dean Henderson (Crystal Palace), Jordan Pickford (Everton), Aaron Ramsdale (Southampton), James Trafford (Burnley)

Defenders: Dan Burn (Newcastle United), Levi Colwill (Chelsea), Marc Guehi (Crystal Palace), Reece James (Chelsea), Ezri Konsa (Aston Villa), Myles Lewis-Skelly (Arsenal), Tino Livramento (Newcastle United), Jarell Quansah (Liverpool), Kyle Walker (AC Milan, loan from Manchester City)

Midfielders: Jude Bellingham (Real Madrid), Eberechi Eze (Crystal Palace), Jordan Henderson (Ajax), Curtis Jones (Liverpool), Cole Palmer (Chelsea), Declan Rice (Arsenal), Morgan Rogers (Aston Villa)

Forwards: Jarrod Bowen (West Ham United), Phil Foden (Manchester City), Anthony Gordon (Newcastle United), Harry Kane (Bayern Munich), Marcus Rashford (Aston Villa, loan from Manchester United), Dominic Solanke (Tottenham Hotspur)