Bayern Munich an chelh

Bundesliga an khelh hnuhnung pahnihah Bayern Munich an chak lo zo. Inrinni zan khan Bavarians hi an mikhualna ramah Union Berlin nen 1-1 in an inhnehtawk a, point khatah an lungawi a ngai.

Alte Forsterei-a inkhelah Bayern hian ball chang tamin hun ṭha insiam hnem viau mah se Union Berlin goalkeeper Frederik Ronnow a cheṭha tlat a, a lo dang hman hram zel.

Minute 75-naah Leroy Sane erawh dan reng theih a ni lo - German forward hian Josip Stanisic siamsak a khung, box sir aṭanga a ball cross hi Union Berlin player paruk ngawtin an chang fuh lo a, a hun taka rawn dawk chhuak Sane-a'n a khung.

Amaherawhchu, hun tawp dawn hnaiah Bayern keeper Jonas Urbig chuan harsa vak loa ball kang chinfel theih tura lang chu a hnek chhuak foh lo, ball dawng fuhtu Benedict Hollerbach chuan chiang zetin a khung a, goal dang a lut zui tawh lo.

Vincent Kompany leh a naute hi league match an khelh hnuhnung zawkah Bochum lakah 3-2 in an chak lo, chumi hnuah Champions League khelin Bayer Leverkusen an hneh, an boruak ṭha hi an chhunzawm thei rih lo a ni.

Bayern manager Kompany chuan, "Kan tan chuan inkhel khan thawhthu pahnih a nei, pakhatah chuan kan result kha a lawmawm loh a, pakhat zawkah chuan kan khel chhe hran lo.

"Union Berlin khan min nawr thei viau a, hun rei tak chhung chu kan inveng thei. Dawhthei taka nghak chungin remchang kan zawng a, goal pawh kan khung ngei mai, mahse kan chhuah zui ve leh kha a pawi lai chu a ni," tiin a sawi.

Season hmasa khan Bayern Munich hian Bayer Leverkusen an tluk lo a, pahnihna an ni. Kompany leh a nauten Bundesliga title laklet ngei tumin thapui an tawh a, point kua in an hmu sang mek, mahse nizan khan Xabi Alonso leh a naute an chak a nih chuan an inkar hi a zim leh ang.