Generator ṭhat loh vangin chhunah semifinal

MFA Cup 2025 semifinal chu floodlight hnuaia khelh tura ruahman a ni a, generator a chian loha vangin vawiin chhun lamah semifinal hi khelh a ni zawk dawn. Chhangphut Field-ah Inrinni tlai khan semifinal khelh a ni a, Thangzuala Memorial FC leh MLS FC ten khaw en laiin first half an khel hman a, Roben-a goal hmangin 1-0 in Thenzawl club-in hma an hruai hman.

Mahse, second half-ah an lut dawn a, khua a thim tawh avangin floodlight tih ên a ṭul a, generator a ṭhat loh avangin a êng thei ta lo. Champhai DFA inbuatsaihna a ṭha a, khawl thil a nih avangin uluk takin en lawk vek mah se a hunah a hman theih ta lo. Inelna buatsaihtu thiam loh niin loin khawl thil chian loh avanga vanduaina a ni.

Thenzawl club Thangzuala Memorial leh Lawngtlai club MLS te hian second half aṭangin an khel ang a, Inrinni inkhela squad-a awm lo chu a inlan thei dawn chuang lo. Semifinal hnuhnung zawk hi chawhnu dar 1:00-ah Vengthar GSA (Khawzawl) leh Electric Veng FC (Kolasib) ten an khel dawn.

MFA Cup-ah hian MPL club khelh phal ni lo mah se MPL player-te an khelh tho avangin inelna level pawh a sang a, MPL kai thar Kanan FC pawh an tla tawh. MPL kai thar dang MLS FC pawhin tla thei dinhmunah an ding.