Champion tum Real Madrid tan Mbappe

Real Madrid-in Champions League quarterfinal an lut zo chiah a, La Liga lamah pawh champion an tum tih pholangin, an mikhualna ramah Villarreal chu 2-1 in an hneh.

Villarreal-in Juan Foyth hmangin hma takah goal hmahruai an khung a, mahse, Real tan Kylian Mbappe chuan chawlhlawk hmain goal hnih a khung a, second half-ah goal dang lut tawh loin Real an chak.

Real-in hnehna an chan avangin table chung ber an luah zui a, mahse, nizan khan Atletico Madrid leh Barcelona inkhelin, an result kan hre hman lo - he thuziak i chhiar meuh chuan table a danglam leh tawh ang.

A goal hma

Yellow Submarine-in UCL khel chau Real lakah bul an ṭan ṭha a, club top scorer Ayoze Perez a nung vet vet hle - minute sarihnaa goal hmahruai an khung hma ngawtin chance vawi hnih a nei hman!

Mahse, Perez dang thei mah se, Thibaut Courtois a che fuh reng thei bik lo - Leicester City attacking midfielder hlui shot a dan per aṭangin corner a chawi a, hei hi Villarreal-in an chhawr ṭangkai.

Corner aṭanga ball kal hi Real tlarhnungten an pet chhuak lawk thei lo a, Villarreal captain Foyth chuan mawhphurhna lain, buai nuai karah, minute sarihna lekah goal hmahruai a khung.

A chhangtu Real

Rin loh zawk Villarreal-in goal hmahruai an khung a, Real an ṭang sawt. Goal an chhuah aṭanga minute 10-na lekah Mbappe a inlar a, French forward hian Brahim Diaz tan through ball ṭha tak a pe.

Diaz-a shot chu Villarreal keeper Diego Conde chuan a lo dang a, a per lehlam chu Mbappe hian goal-ah a chantir. French striker hian a goal khung pawh lawm duh loin a tlan let lehnghal a, chak loh a hlau.

French striker hian minute 23-naah nalh zetin an goal hnihna a khung zui a, goal dang lut tawh loin Real an chak - Mbappe hian tun season-ah match 44 khelin goal 31 ngawt a khung ta a, assist vawi li a nei. Amah sawiseltute ka a hupsak chiang hle.

Carlo a lawm lo

Madrid an chak a, mahse, inkhelah zawhah Real Madrid manager Carlo Ancelotti chuan mipui thin ṭhawng dawt khawp thu a sawi - darkar 72 tal chawlh hahdamna hun an nei a nih loh chuan an inkhelh tawh loh tur thu a sawi rem mai!

King Carlo chuan, "Kan chau hle chungin kan ṭang ve tlat. Second half-ah kha chuan an chau ta deuh a, mahse, kha chu thil nihphung ve reng a ni. Zanina kan hnehna hian kan squad chhahzia leh he team inpekzia a pholang a ni.

"Mahse, tun hi darkar 72 chawlh nei loa kan inkhelh hnuhnung ber a ni tawh ang. La Liga hnenah inkhelh hun sawn turin vawi hnih kan dil tawh a, engmah an ti lo," a ti - Real hian Nilaini zan khan UCL-ah minute 120 an khel a, Atletico Madrid chu last 16 aṭangin an pet chhuak a, an chau hi an demawm hran lo.