Milan chak zanah Alli hnawtchhuak

Goal an phurh hmasak hnuah Christian Pulisic leh Tijjani Reijnders ten an sut a, chak lo thei dinhmuna ding hmasa AC Milan chuan Serie A kai thar Como chu 2-1 in an hneh hram a, point thum hlu tak an hlawh chhuak.

Inrinni zan San Siro-a inkhelah Como hian Lucas Da Cunha hmangin minute 33-naah goal an khung a, team ṭha zawk leh mualneitu ni bawk Milan an barakhaih. Mahse, Pulisic leh Reijnders te goal hmangin an chhanglet.

Milan coach Sergio Conceicao chuan, "Goal venhim kawngah hian ṭhat tawk lohna lai kan nei a, tun ṭumah pawh kha a lang. Mahse, ka naute hi an puitling tawh a, dinhmun hniam zawka din hnuah pawh thawh chhuah dan an hria," tiin a sawi.

Como tan hian Dele Alli a inlan a, English midfielder hi kum 2023 February hnua a inkhelh lehna hmasa ber ni mah se, khelmual a luh aṭanga minute 10 hnu lekah hnawhchhuah a ni, a tan hun duhawm a ni thei rih lo.

Nikum December aṭang khan Alli hian Cesc Fabregas hnuaiah training a nei a, minute 81-naah dah luh a ni. Mahse, England international hi Milan midfielder Ruben Loftus-Cheek a tihtluk avangin hrem a ni a, a ṭhiante an chak lo zui bawk.

Kai thar Como hian Serie A match 29 an khelh tawhah point 29 hmuin 13-na an ni mek a, season thara Italian football inelna sang khelh chhunzawm an beisei mek; Milan chuan point 47 hmuin pasarihna an ni thung.