Season thar atan Saudi Arabia GP?

Car intlansiakna sang ber Formula 1 season thar hman dan tur an duang chhin mek a, inelna neih tur zingah Jeddah tlan kawnga neih turin Saudi Arabian Grand Prix neih an tum.

F1 thuneitu lamin intlansiak hi a tam thei ang ber neih an duh, Saudi Arabian GP pawh 2023 aṭanga neih tur ni mah se tlankawng a inpeih hman a nih chuan nakkuma telh an pawi ti lo, Brazil rama an tlan thei bawk a nih chuan intlansiak 23 awm thei tura ruahman a ni.

Kuminah hian corona-virus vangin F1 hi a buai hle, season ṭan hun pangngaiah an tlan ṭan thei lo a, ram ṭhenkhatah chuan inelna vawi hnih an neih te a ngai hial - season zawh hun pawh tun hma aiin a tlai dawn.

Season thar chu nak-kum March thla laihawl hian Melboure khawpuiah Australian GP hmanga khuhhawn leh tur a ni dawn a, kumina an neih theih lohna China, Japan leh Canada pawh telh an ni leh ang.