Verstappen hmaah Lando Norris a thleng

Formual 1 season thar chu nimin khan an tlan ṭan a, champion lai Max Verstappen hmaah Lando Norris a thleng - nimin a tlan zawh tak Australian Grand Prix-ah Norris hian hnehna a chang a ni.

Melbourne Grand Prix Circuit-a intlansiakah McLaren leh Norris ten thutlukna an siam dik a, intlansiak tawp lamah tlan kawng huh mah se an buai lo, champion an tum ngam tih chu a takin an lantir.

Kum 25 mi Norris hian qualifying pawh a tlan ṭha, a hmasa ber aṭangin a tlan chhuak thei a, amaherawhchu inelna takah chuan Verstappen a chak ringtu an tam, tun hma lama a lo chet tawh ṭhin dan ngaihtuah pawhin a mak lo.

Mahse, season chawhnu lam aṭanga che ṭha thei tak Norris hian Red Bull leh an duhlai Verstappen hi a el phak tlat a, season dang zawng aiin champion tur hriatthiam a harsa dawn niin a lang.

A zawna vawi li champion thei Max-a erawh dah hniam theih a ni ngawt lo, duhthusama a chet loh ṭum pawhin pahnihna a la ni thei tho a, a nomawi kawl lai hi chuti maia hloh a phal dawn lo, inelna a hmuhnawm chho dawn hle.

Lewis Hamilton erawhin beisei a phak lo - Mercedes aṭanga Ferrari zawmtu hi 10-naah a thleng phak ve chauh a, a vawi riat nana champion a tum a nih chuan hmasawnna lai tur a ngah dawn hle tih a chiang.

Britain tlangval Hamilton chuan, "Ka beisei leh rin ang a ni miah lo a, tlan chhinna kan neih ang kha a ni lo. A nihna takah chuan tun ṭuma kan car kha chu ka tan khalh a harsa takzet," tiin a sawi a, season ṭan hmain Ferrari car fak viau mah se a rin ang a ni rih lo.

Khawvela car intlansiakna sang ber hian Asia khawmualpui an hawi zui dawn. March 23, Pathianni hian Chinese Grand Prix an tlan ang a, chumi hnuah Japan, Bahrain leh Saudi Arabian Grand Prix an tlan bawk dawn a ni.