Mohammedan-in Fatau an lalut

Season thara I League khel tur Mohammedan Sporting Club-in league nomawi chawi ngei tumin squad an thuam chhah zel a, Ghanaian defensive midfielder Mohammed Fatau an lalut. 

Kum 27 mi midfielder hi Serie A club Udinese youth system chhuak a ni a, Spanish La Liga club Granada, Rayo Vallecano leh Almería tan pawha lo khel tawh a nih avangin I League-ah chuan player hmuhnawm pawl a ni ang. 

Fatau hian Turkish Super Lig club Gaziantepspor, Saudi Arabia club Al-Qadsiah leh Kuwait club Al-Kuwait tan pawh a lo khel tawh a, season hmasa kha Swedish fourth division club IFK Lulea tan a khel. 

Mohammedan hian Nigerian forward Raphael Ownrebe pawh an lalut hnai nia sawi a ni a, kum 2017 aṭang khan Bangladesh Premier League (BPL)-ah a inlan tawh - Sheikh Jamal tan khelin a season hmasa berah hian goal 15 khunga assist vawi kua neiin top scorer a ni. 

BPL-a season khat a hman hnu lawkah Sheikh Russel FC a zawm a, 2018-19 season khan goal 22 khungin top scorer-a ni nawn leh a ni - Nigeria lamah pawh goal khung a uar hle. 

Kum 2015 khan First Bank FC tana khelin match 25-ah goal 20-a khung a, assist vawi 11-a nei bawk. Bayelsa United-a zawm zui a,  he club tan pawh hian match 20 lekah goal 26-a khung. 

Mohammedan hian coach thar atan Jose Carlos Rodriguez Hevia an lakluh thu an puang tawh a, Spanish coach hi Indian football-ah a mikhual lo - Shillong Lajong coaching and youth development-ah technical director hna a lo chelh tawh a, August thleng khan he hna hi a chelh. 

Kum 2014 khan India-ah hna a thawk ṭan a, Pune khawpuia Arsenal Soccer School-ah technical director a ni a, hetihlai hian Indian Super League club Pune City coaching staff zingah a tel bawk. 

Minerva Punjab leh Madhya Bharat-ah a thawk tawh bawk a, Mohammedan hian a tawnhriat ṭha tak hi chhawr ṭangkai theih an inbeisei ang.